ពេលដែលអរិភាពតំបន់ឈូងសមុទ្រឆាបឆេះម្តងទៀត ក្រោយអ៊ីរ៉ង់វាយប្រហារគូវ៉ែត បណ្តាលឲ្យខូចខាតអាកាសយានដ្ឋាន និងធ្វើឲ្យមនុស្សរាប់សិបនាក់រងរបួស ខណៈយោធាសហរដ្ឋអាមេរិក បើកការវាយប្រហារនៅជិតច្រកសមុទ្រ Hormuz នោះ អ្នកនាំពាក្យអង្គការសហប្រជាជាតិ(UN) បានចាប់ផ្តើមធ្វើសន្តិសីទសារព័ត៌មាន ដើម្បីបង្ហាញពីការព្រួយបារម្ភរបស់អគ្គលេខាធិការ UN លោក Antonio Guterres ជុំវិញវិបត្តិមួយនេះ ។

ស្របពេលអំពើហិង្សាផ្ទុះឡើងជាថ្មី វិស័យការទូត ដើម្បីបញ្ឈប់សង្រ្គាមមួយនេះ ហាក់បង្ហាញសញ្ញាតិចតួចប៉ុណ្ណោះនៃវឌ្ឍនភាព ។

ការវាយប្រហារនេះដែរ គឺជាការធ្វើតេស្តចុងក្រោយចំពោះបទឈប់បាញ់ដ៏រង្គោះរង្គើរ ធ្វើឲ្យតម្លៃប្រេងកើតឡើងជិត ២ភាគរយ ស្របពេលដែលច្រកសមុទ្រនៅតែបិទភាគច្រើន ក្នុងរយៈពេលជាង ៣ខែកន្លងមកនេះ ក្រោយសហរដ្ឋអាមេរិក និងអ៊ីស្រាអែល រួមដៃគ្នាវាយប្រហារអ៊ីរ៉ង់ ។

លោក Stephane Dujarric គឺជាអ្នកនាំពាក្យ UN និយាយថា លោក Guterres មានការព្រួយបារម្ភចំពោះការវាយប្រហាររាយការណ៍កាលពីពេលកន្លងទៅរវាងសហរដ្ឋអាមេរិក និងសាធារណរដ្ឋអ៊ិស្លាមអ៊ីរ៉ង់ ហើយនិងសេចក្តីរាយការណ៍ថា អ៊ីរ៉ង់ បានវាយប្រហារគោលដៅគូវ៉ែត និងបារ៉ែន ។

លោកបន្តថា លោក Guterres ពិតជាខ្វាយខ្វល់ខ្លាំងណាស់ចំពោះសេកច្តីរាយការណ៍ចំពោះគ្រោះថ្នាក់ដល់អាយុជីវិតជនស៊ីវិល ។

ក្រុមអាជ្ញាធរគូវ៉ែត និងសារព័ត៌មានរដ្ឋរាយការណ៍ថា ការវាយប្រហារមីស៊ីល និងយានដ្រូនអ៊ីរ៉ង់ បណ្តាលឲ្យខូចខាតអគារក្នុងអាកាសយានដ្ឋាន និងបេសកកម្មការទូត ដោយសម្លាប់មនុស្សម្នាក់ និងមនុស្សជាង ៦០នាក់ផ្សេងទៀត រងរបួស ។

ខណៈពេលនោះដែរ បញ្ជាការកណ្តាលសហរដ្ឋអាមេរិកនិយាយថា មីស៊ីលអ៊ីរ៉ង់ ២គ្រាប់បាញ់លើគូវ៉ែត បានធ្លាក់ ឬផ្ទុះពាក់កណ្តាលផ្លូវ ហើយមីស៊ីល ៣គ្រាប់ដែលបានវាយប្រហារប្រទេសបារ៉ែន ត្រូវបានស្កាត់ជាប់ដោយកងកម្លាំងសហរដ្ឋអាមេរិក និងកងកម្លាំងបារ៉ែន ។

សូមបញ្ជាក់ថា អរិភាពនៅតំបន់ឈូងសមុទ្រ បានឆាបឆេះជាថ្មីនៅថ្ងៃពុធ ក្រោយការវាយប្រហារប្រហារមីស៊ីលអ៊ីរ៉ង់លើបារ៉ែន គូវ៉ែត និងគោលដៅផ្សេងទៀតក្នុងតំបន់ ៕