ក្រសួងការបរទេសបានឲ្យ​ដឹង​ថា សហរដ្ឋអាមេរិក និងកូរ៉េខាងត្បូង បានធ្វើកិច្ចពិគ្រោះយោបល់ទ្វេភាគី ស្តីពីកិច្ចសហប្រតិបត្តិការនុយក្លេអ៊ែរ នៅទីក្រុងសេអ៊ូល កាលពីថ្ងៃអង្គារ និងថ្ងៃពុធ (ទី ២-៣ ខែមិថុនា ឆ្នាំ២០២៦)​។

ក្រសួងបាន​ឲ្យ​ដឹង​នៅក្នុង​សេចក្ដី​ថ្លែង​ការណ៍​ថា កិច្ចប្រជុំនេះត្រូវបានធ្វើ​ឡើង​ដោយអនុ​រដ្ឋមន្ត្រីក្រសួង​ការបរទេសអាមេរិក ទទួលបន្ទុកកិច្ចការនយោបាយ លោកស្រី Allison Hooker និងអនុរដ្ឋមន្ត្រីការបរទេសទី១ របស់កូរ៉េខាងត្បូង លោក Park Yoon-joo ដោយ​តាម​មកដោយការពិភាក្សាជាក់លាក់តាមវិស័យ ដែល​មាន​តំណាងអន្តរទីភ្នាក់ងារមកពីភាគីទាំង២។

សេចក្តីថ្លែងការណ៍បាន​ឲ្យ​ដឹង​ថា៖ «ភាគីទាំង២ បានប្តេជ្ញាធ្វើការឆ្ពោះទៅរកការសម្រេចបាននូវលទ្ធផលជាក់ស្តែងឲ្យ​បានឆាប់តាមដែលអាចធ្វើទៅបាន ដើម្បីបង្កើតនូវ​ដំណាក់​កាល​សំខាន់ៗ សម្រាប់ការពិនិត្យឡើងវិញនូវវឌ្ឍនភាពពេញមួយឆ្នាំ និងដើម្បីពន្លឿនការពិគ្រោះយោបល់នាពេលអនាគត»។

យោងតាមទីភ្នាក់ងារសារព័ត៌មាន Yonhap ដោយដកស្រង់សម្តីក្រសួងការបរទេសកូរ៉េខាងត្បូង បាន​ឲ្យ​ដឹង​ថា ធាតុសំខាន់ៗនៃរបៀបវារៈ រួមមានការជំរុញរបស់ទីក្រុងសេអ៊ូល ក្នុងការសាងសង់នាវាមុជទឹកដើរដោយថាមពលនុយក្លេអ៊ែរ ធានាសិទ្ធិចម្រាញ់​សារធាតុអ៊ុយនី​រ៉ាញ៉ូម និងពង្រីកកិច្ចសហប្រតិបត្តិការសាងសង់នាវា រវាងភាគីទាំង២។

គួរ​បញ្ចាក់​ថា ការពិគ្រោះយោបល់នេះ ធ្វើឡើងបន្ទាប់ពីមាន​ឯកសារ​កិច្ចព្រម​ព្រៀងរួម ​ដែលចេញដោយប្រធានាធិបតីអាមេរិក លោក Donald Trump និងមេដឹកនាំ​កូរ៉េខាងត្បូង លោក Lee Jae Myung ក្នុងខែវិច្ឆិកា។ ក្នុង​ឯកសារ​នោះ ទីក្រុងវ៉ាស៊ីនតោនបានគាំទ្រដំណើរការដែលអាចអនុញ្ញាតឲ្យ​កូរ៉េខាងត្បូងបន្តការចម្រាញ់​​សារធាតុអ៊ុយរ៉ានី​ញ៉ូមស៊ីវិល និងការកែច្នៃប្រេងឥន្ធនៈដែលត្រូវ​បានប្រើហើយ​ សម្រាប់ការប្រើប្រាស់ដោយសន្តិវិធី៕