​ទួរគី៖ រដ្ឋមន្ត្រីការបរទេស​ទួរគី​លោក​ Mevlut Cavusoglu បាន​និយាយ​ក្នុង​បទសម្ភាសន៍​នៅ​លើ​កញ្ចក់​ទូរទស្សន៍​ថា​ ទួរគី​ចង់បាន​ការចរចា​បញ្ចប់​ជម្លោះ​ក្នុង​ប្រទេស​អ៊ុយ​ក្រែ​ន តែ​ប្រទេស​ជា​សមាជិក​សម្ព័ន្ធ​ណា​តូ​មួយ​ចំនួន​ទៀត បែរជា​ចង់​ឃើញ​ជម្លោះ​នៅ​អ៊ុយ​ក្រែ​ន​អូស​បន្លាយ ដើម្បី​ធ្វើបាប​រុស្ស៊ី​ឲ្យ​គ្រោះថ្នាក់​ធ្ងន់ធ្ងរ​។

​ក្នុង​ពេល​បង្ហាញ​វត្តមាន​នៅ​លើ​កញ្ចក់​ទូរទស្សន៍ CNN ជា​ភាសា​ទួរគី លោក Cavusoglu បាន​បញ្ជាក់​ពី​ការ​សម្រេចចិត្ត​របស់​ទួរគី​មិន​ដាក់ទណ្ឌកម្ម​លើ​ក្រុង Moscow និង​មូលហេតុ​ធ្វើ​ឲ្យ​ជំនួប​ចរចា​នៅ​ទីក្រុង Istanbul រវាង​រុស្ស៊ី និង​អ៊ុយ​ក្រែ​ន​បរាជ័យ។ ​ប្រមុខ​ការទូត​ទួរគី​រូប​នេះ​បាន​និយាយ​ថា មាន​ប្រទេស​ជា​សមាជិក​ណា​តូ​មួយ​ចំនួន​ដែល​ចង់​ឲ្យ​សង្គ្រាម​នៅ​អ៊ុយ​ក្រែ​នប​ន្ត។ ពួកគេ​ចង់​ឃើញ​ភ្លើង​សង្គ្រាម​បន្ត​ឆាបឆេះ ជា​ការ​ដាក់​បន្ទុក​លើ​រុស្ស៊ី។ ពួកគេ​មិនសូវ​ខ្វល់​ខ្វាយ​ប៉ុន្មាន​ទេ​អំពី​ស្ថានភាព​ក្នុង​ប្រទេស​អ៊ុយ​ក្រែ​ន​។

​ខណៈ​ដែល​លោក​មិនបាន​បង្ហើប​ពី​ឈ្មោះ​ប្រទេស​ណាមួយ ប្រធានាធិបតី​សហរដ្ឋអាមេរិក​លោក Joe Biden បាន​និយាយ​កាលពី​ដើមខែ​នេះ​ថា ជម្លោះ​នេះ​អាច​បន្ត​រយៈពេល​យូរ​ទៀត ដែល​ត្រូវ​បាន​បន្ទរ​ដោយ​អតីត​ប្រធាន​ចារកម្ម​អាមេរិក CIA ទទួលបន្ទុក​តាមដាន​ប្រតិបត្តិការ​របស់​រុស្ស៊ី​។​ ​ចំណែក​អធិការបតី​អាល្លឺម៉ង់​លោក Olaf Scholz បាន​សន្ទនា​តាម​ទូរស័ព្ទ​ជាមួយ​បណ្ដា​មេដឹកនាំ ​នៃ​ប្រទេស​មាន​ឧស្សាហកម្ម​លូតលាស់​ទាំង ​7 ឬ G7 កាលពី​ថ្ងៃ​អង្គា​រថា លោក​ខាង​លិច​ត្រូវតែ​រួម​កម្លាំង​គ្នាធ្វើ​យ៉ាង​ណា​កុំ​ឲ្យ​រុស្ស៊ី​ឈ្នះ និង​ប្ដេជ្ញា​បន្ត​ផ្ដល់​អាវុធ​ឲ្យ​ទាហាន​អ៊ុយ​ក្រែ​ន ​ដើម្បី​ឲ្យ​ប្រទេស​នេះ​មាន​លទ្ធភាព​បន្ត​ការពារ​ខ្លួន​ប្រឆាំង​ការ​វាយ​លុក​របស់​ប្រទេស​រុស្ស៊ី៕

អត្ថបទ៖ សុខមាន