រយៈពេល ៤ថ្ងៃកន្លងមកនេះ ជនអន្តោប្រវេសន៍ម៉ូសំប៊ិក លោក Lado Amido បានឆ្លើយតប នៅពេលមានគេគោះទ្វារផ្ទះរបស់លោក នៅក្នុងទីក្រុង Kleinmond នៃប្រទេសអាហ្វ្រិកខាងត្បូង។ នៅខាងក្រៅ ហ្វូងមនុស្សដែលមានកំហឹងបានប្រាប់លោកថា ជនបរទេសដូចជាលោក ត្រូវតែចាកចេញ។ ពួកគេបានចេញពី ផ្ទះមួយចូលទៅផ្ទះមួយ ដើម្បីផ្តល់សារដូចគ្នា។

លោក Amido បានរត់គេចខ្លួន ហើយបានចំណាយពេលពីរយប់នៅលើភ្នំ។ ឥឡូវនេះ លោកកំពុងជ្រកកោននៅក្នុងសាលាក្រុងក្នុងស្រុក ដូចជាជនអន្តោប្រវេសន៍ដទៃទៀតមកពីប្រទេសម៉ាឡាវី និងម៉ូសំប៊ិក នៅទូទាំងខេត្ត Western Cape របស់អាហ្វ្រិកខាងត្បូង ដែលត្រូវបានបង្ខំឲ្យលាក់ខ្លួនពីហ្វូងមនុស្សប្រឆាំងនឹងជនអន្តោប្រវេសន៍ នៅក្នុងទីក្រុងឆ្នេរសមុទ្រមួយចំនួន។

អាហ្វ្រិកខាងត្បូងបានឃើញរលកនៃការតវ៉ាប្រឆាំងនឹងជនអន្តោប្រវេសន៍ ដែលជួនកាលបានប្រែក្លាយទៅជាអំពើហិង្សា ក្នុងប៉ុន្មានសប្តាហ៍ថ្មីៗនេះ។ ប្រទេសម៉ូសំប៊ិកបាននិយាយថា ពលរដ្ឋ ៥ នាក់របស់ខ្លួន ត្រូវបានសម្លាប់ នៅក្នុងការវាយប្រហារដែលរើសអើងជនបរទេស នៅក្នុងទីក្រុង Mossel Bay កាលពីចុង សប្តាហ៍មុន៕