នៅថ្ងៃព្រហស្បតិ៍ (ទី៤ ខែមិថុនា ឆ្នាំ២០២៦) នេះ ​ឥណ្ឌា និងវ៉េណេស៊ុយអេឡា បានប្រឹង​ប្រែង​ជំរុញទំនាក់ទំនងរបស់ប្រទេស​ទាំង២ នៅក្នុងវិស័យថាមពល ដោយទីក្រុងញូវដេលី លើក​ឡឡើង​ថា ទី​ក្រុង​ការ៉ាកាស មើលឃើញខ្លួនឯង​ថា ​ជាដៃគូល្អ​ជាង​គេ​ នៅក្នុងវិស័យនេះ នៅពេលដែលការផ្គត់ផ្គង់ប្រេងសកល ត្រូវបានរំខានដោយវិបត្តិ នៅ​តំបន់​មជ្ឈិមបូព៌ា។

ប្រធានាធិបតីស្តីទីរបស់វ៉េណេស៊ុយអេឡា លោកស្រី​ Delcy Rodriguez កំពុងធ្វើទស្សនកិច្ចនៅឥណ្ឌា ជាមួយរដ្ឋមន្ត្រីមួយចំនួនធំ និងបានជួបពិភាក្សាជាមួយនាយករដ្ឋមន្ត្រីឥណ្ឌា លោក Narendra Modi នៅថ្ងៃព្រហស្បតិ៍នេះ​។

បន្ទាប់ពីមាន​ជំនួប​នេះ​ អ្នក​ការទូត នៅក្នុងក្រសួងការបរទេសឥណ្ឌា លោក Rudrendra Tandon បានប្រាប់សន្និសីទសារព័ត៌មានថា ការពិភាក្សា រវាងភាគីទាំង២ ផ្តោតលើកិច្ចសហប្រតិបត្តិការ ក្នុងគម្រោងថាមពល រាប់​ចាប់​ពីការ​រុក​រក​ រហូត​ដល់​ការ​លក់។

លោក Tandon បានឲ្យ​ដឹង​ទៀត​ថា៖ «យើងកំពុងធ្វើការជាមួយរដ្ឋាភិបាលមាន​ភាព​ជាមិត្ត​មួយ ដែលចង់បានភាពជាដៃគូជាមួយឥណ្ឌា។ យើងចង់តបស្នងទៅ​វិញ។ ប្រទេសវ៉េណេស៊ុយអេឡា ជាប្រពៃណីគឺ​ជាមិត្តដ៏​ជិតស្និទ្ធ។ យើងបានសហការយ៉ាងជិតស្និទ្ធនៅកម្រិតអន្តរជាតិ ដូច្នេះយើងកំពុងវិលត្រឡប់ទៅរកប្រក្រតីភាព​វិញ»។

លោក Tandon បានបន្ថែម​ថា វ៉េណេស៊ុយអេឡាមើលឃើញឥណ្ឌាថា ជា «ដៃគូដ៏​គួរឲ្យ​ពេញ​ចិត្ត​ជាង​គេ» ក្នុងវិស័យថាមពល ហើយលោកស្រី Rodriguez នឹងទៅមើល​រោងចក្រចម្រាញ់ប្រេង នៅក្នុងប្រទេសឥណ្ឌា អំឡុងដំណើរទស្សនកិច្ចរបស់លោកស្រី ដែលបញ្ចប់នៅថ្ងៃទី៧ ខែមិថុនា។

គួរ​បញ្ជាក់ថា ដំណើរទស្សនកិច្ចរបស់លោកស្រី Rodriguez បានកើតឡើងនៅពេលដែលឥណ្ឌា ដែលជាប្រទេសនាំចូលប្រេង និងអ្នកប្រើប្រាស់ប្រេងធំជាងគេទី៣ របស់ពិភពលោក កំពុងជួប​ការលំបាក​ដោយសារ​ការរំខានដល់ការផ្គត់ផ្គង់ដែលបណ្តាលមកពីសង្គ្រាម រវាងសហរដ្ឋអាមេរិក និងអ៊ីស្រាអែល ជាមួយអ៊ីរ៉ង់។ ជម្លោះ​នេះ​បានបិទច្រកសមុទ្រ Hormuz ជាផ្លូវទឹកសំខាន់មួយដែលដឹកជញ្ជូនប្រេងឆៅជាង ៤០ភាគរយ​នៃការនាំចូលប្រេងឆៅរបស់ប្រទេសអាស៊ីខាងត្បូងមួយ​នេះ៕