កងទ័ពអ៊ីស្រាអែល នៅ​ថ្ងៃព្រហស្បតិ៍ (ទី៤ ខែមិថុនា ឆ្នាំ២០២៦) បាន​ប្រាប់​ថា ខ្លួននឹងបន្តការវាយលុក​ នៅភាគខាងត្បូងលីបង់ ទោះបីជាមានសេចក្តីប្រកាសត្រីភាគីដែលចេញនៅទីក្រុងវ៉ាស៊ីនតោន ដោយប្រកាសពីកិច្ចព្រមព្រៀង ស្តីពីបទឈប់បាញ់ក៏ដោយ ខណៈដែលរដ្ឋមន្ត្រីក្រសួងការពារជាតិ លោក Israel Katz បាននិយាយថា ប្រតិបត្តិការយោធានឹងបន្តរហូតដល់ក្រុមហេសបូឡាត្រូវបានលុប​បំបាត់​ពីតំបន់ភាគខាងត្បូងនៃទន្លេ Litani។

ចាប់តាំងពីថ្ងៃទី២ ខែមីនាមក អ៊ីស្រាអែលបានធ្វើការវាយលុកទ្រង់ទ្រាយធំមួយ នៅក្នុងប្រទេសលីបង់ ដែលបានសម្លាប់មនុស្សជាង ៣.៥០០នាក់ បណ្ដាល​ឲ្យ​រង​របួសជាង ១០.៦០០នាក់ និងបាននាំ​ឲ្យ​មនុស្សជាង ១លាននាក់ផ្លាស់ទី​លំនៅ។ នេះបើយោងតាមតួលេខផ្លូវការ។

អ្នកនាំពាក្យកងទ័ពអ៊ីស្រាអែល លោក Avichay Adraee បានឲ្យ​ដឹង​នៅលើបណ្ដាញ​សង្គម X ថា៖ «ការប្រយុទ្ធគ្នានៅភាគខាងត្បូងលីបង់ កំពុងបន្តមាន​ ហើយកងទ័ពអ៊ីស្រាអែលបន្តកំណត់គោលដៅលើទីតាំង និងហេដ្ឋារចនាសម្ព័ន្ធរបស់ក្រុម​ហេសបូឡាដែលមានទីតាំងនៅនោះ​ និងក្បែរភូមិរបស់អ្នក»។

លោក Adraee បានជំរុញឲ្យ​ប្រជាជនជៀសវាងកុំ​ធ្វើដំណើរទៅភាគខាងត្បូងនៃទន្លេ Zahrani «រហូតដល់មានការជូនដំណឹងបន្ថែម» ដោយព្រមានថា «អ្នកណាដែលធ្វើដំណើរទៅភាគខាងត្បូង កំពុងធ្វើឲ្យ​ជីវិតរបស់ពួកគេ​ស្ថិត​ក្នុង​គ្រោះថ្នាក់​»។

ដោយឡែក លោក Katz បាននិយាយថា កិច្ចព្រមព្រៀងបទឈប់បាញ់ដែលសម្រេចបានជាមួយទីក្រុងបេរូត «នៅតែមានលក្ខខណ្ឌ« ឲ្យ​លុប​បំបាត់យុទ្ធជនរបស់ក្រុម​ហេសបូឡាចេញពីភាគខាងត្បូងលីបង់៕