កូសូវ៉ូនឹងធ្វើការបោះឆ្នោតសភា នៅថ្ងៃអាទិត្យ (ទី៧ ខែមិថុនា ឆ្នាំ២០២៦) នេះ ដែលជាការបោះឆ្នោតលើកទី៣ របស់ប្រទេស​ ក្នុងរយៈពេលត្រឹមតែ ១៨ខែប៉ុណ្ណោះ បន្ទាប់ពីគណបក្សនយោបាយនានា មិន​អាច​ឈានដល់ការសម្របសម្រួល លើការជ្រើសរើសប្រធានាធិបតីថ្មី។

ប្រជាជាតិ​ដ៏​តូចនៅតំបន់បាល់កង់មួយនេះ​ ដែលជាប្រទេសកើត​ក្រោយ​បំផុត​ នៅតំបន់​អឺរ៉ុប មានបំណង​ចង់ចូលរួមជាមួយសហភាពអឺរ៉ុប (EU) ប៉ុន្តែមិនមានរដ្ឋាភិបាលដំណើរការ​ធម្មតា​ដោយ​ភាគច្រើន​ សម្រាប់​ឆ្នាំកន្លង​មក​នេះ ដោយសារសភាដែលពេញ​ដោយ​ការ​បែកបាក់ មិន​អាច​ជ្រើសរើសប្រធានសភាជាដំបូង​ ហើយបន្ទាប់មកប្រមុខរដ្ឋថ្មី។

មិនមានការស្ទង់មតិណាមួយត្រូវបានធ្វើឡើងថ្មីៗនេះទេ ប៉ុន្តែអ្នកវិភាគ ព្យាករពីការ​មាន​ជ័យជម្នះម្តងទៀត សម្រាប់គណបក្ស Vetevendosje របស់នាយករដ្ឋមន្ត្រី លោក​ Albin Kurti។ តែ​យ៉ាង​ណាក្ដី ពួកគេលើកឡើង​ថា រូប​លោក​នៅតែត្រូវការឈានដល់ការសម្របសម្រួលជាមួយគណបក្សប្រឆាំង ដើម្បីធានាបានសំឡេងភាគច្រើនដាច់​ខាតដែលត្រូវការ ២ភាគ៣ ដើម្បីជ្រើសរើសប្រធានាធិបតីថ្មី។

គណបក្សរបស់លោក Kurti បានឈ្នះសន្លឹក​ឆ្នោត ៥១,១ភាគរយ នៅក្នុងការបោះឆ្នោតចុងក្រោយ ក្នុងខែធ្នូឆ្នាំ​មុន​ ប៉ុន្តែមិនអាចព្រម​ព្រៀង​ជាមួយគណបក្សផ្សេងទៀត ជុំវិញ​បេក្ខជន សម្រាប់តំណែងប្រធានាធិបតីដែលភាគច្រើនជាតំណែង​ពិធីការ​ ដោយ​នាំ​ឲ្យ​មានការរំលាយសភានៅក្នុងខែមេសា និងការបោះឆ្នោតមុន​អាណត្តិ​មួយ​ផ្សេងទៀត។

គណៈកម្មការរៀបចំការបោះឆ្នោតរបស់កូសូវ៉ូ បានឲ្យ​ដឹង​ថា បេក្ខជនជាង ៩០០នាក់ មកពីគណបក្សចំនួន ១៧ និងក្រុមចម្រុះ ៣ កំពុងប្រកួតប្រជែងដណ្តើមអាសនៈនៅក្នុងសភាដែលមាន ១២០​អាសនៈ។ អ្នកបោះឆ្នោតប្រហែល ២,១លាននាក់ត្រូវបានចុះឈ្មោះ ពោល​គឺច្រើនជាងចំនួនប្រជាជន ១,៦លាននាក់របស់កូសូវ៉ូ ដោយសារតែមានជនភៀសខ្លួនច្រើន ដែលភាគច្រើនមានមូលដ្ឋាននៅអឺរ៉ុបខាងលិច និងមានទំនោរគាំទ្រគណបក្សរបស់លោក Kurti៕