ឯកអគ្គរដ្ឋទូតអ៊ីស្រាអែលប្រចាំនៅសហរដ្ឋអាមេរិកលោក Yechiel Leiter និយាយថា លោកមានជំនឿចិត្តលើបទឈប់បាញ់ប្រកាសថ្មីរវាងអ៊ីស្រាអែល និងលីបង់ថា នឹងចូលជាធរមាន ដោយរូបលោកចាត់ទុកវាជាការទម្លុះភាពទាល់ច្រកមួយនៃអំពើហិង្សាវដ្តរាប់ទសវត្សរ៍នៅតាមតំបន់ព្រំដែន ។

លោក Leiter និយាយប្រាប់ក្រុមអ្នកសារព័ត៌មាននៅទីក្រុងវ៉ាស៊ីនតោនថា កិច្ចព្រមព្រៀងដែលគាំទ្រដោយសហរដ្ឋអាមេរិកនេះ នឹងពាក់ព័ន្ធនឹងតំបន់សាកល្បងដឹកនាំដោយសហរដ្ឋអាមេរិកនៅតំបន់ភាគខាងត្បូងលីបង់ ជាទីដែលកងទ័ពលីបង់ និងកងកម្លាំងពិសេសនឹងត្រូវដាក់ពង្រាយបន្តិចម្តងៗ ដើម្បីរារាំងការវិលត្រឡប់មកវិញរបស់យុទ្ធជនហេសបូឡា ក្រោយការដកទ័ពចេញរបស់អ៊ីស្រាអែល ។

លោកបន្តថា កិច្ចព្រមព្រៀងនេះ ត្រូវបានរៀបចំឡើង ដើម្បីបញ្ចៀសការដួលរលំបទឈប់បាញ់ម្តងហើយម្តងទៀតរវាងអ៊ីស្រាអែល និងក្រុមហេសបូឡា ។

ទោះបីជាយ៉ាងណាក៏ដោយ កងទ័ពអ៊ីស្រាអែលនិយាយនៅថ្ងៃព្រហស្បតិ៍នេះថា ពួកគេនឹងបន្តការវាយលុក នៅភាគខាងត្បូងលីបង់ ទោះបីជាមានសេចក្តីប្រកាសត្រីភាគីស្តីពីបទឈប់បាញ់ក៏ដោយ នៅទីក្រុងវ៉ាស៊ីនតោន ខណៈរដ្ឋមន្ត្រីក្រសួងការពារជាតិ លោក Israel Katz បាននិយាយថា ប្រតិបត្តិការយោធានឹងបន្តរហូតដល់ក្រុមហេសបូឡាត្រូវបានលុបបំបាត់ពីតំបន់ភាគខាងត្បូងនៃទន្លេ Litani ៕