រដ្ឋបាលរបស់​លោកប្រធានាធិបតី​ Donald Trump បានប្រាប់​ឲ្យ​ដឹង​ថា អ៊ីស្រាអែល និងលីបង់ បានយល់ព្រមអនុវត្តបទឈប់បាញ់ថ្មី បន្ទាប់ពីមាន​ការចរចាសម្របសម្រួលដោយសហរដ្ឋអាមេរិក ជាចំណាត់​ការ​ដែលបង្កើនក្តីសង្ឃឹមពី​ការ​មាន​វឌ្ឍនភាព ឆ្ពោះទៅរកការបញ្ចប់សង្គ្រាមអាមេរិក-អ៊ីស្រាអែល ជាមួយអ៊ីរ៉ង់។

ទីក្រុងតេអេរ៉ង់ បានធ្វើឲ្យ​បទឈប់បាញ់នៅលីបង់ ជាលក្ខខណ្ឌ សម្រាប់ការ​មាន​កិច្ចព្រមព្រៀងសន្តិភាពណាមួយជាមួយទីក្រុងវ៉ាស៊ីនតោន ហើយបានលើក​ឡើងក្នុងរយៈពេលប៉ុន្មានថ្ងៃថ្មីៗនេះថា ខ្លួនអាចធ្វើអន្តរាគមន៍ដោយផ្ទាល់ ក្នុងការគាំទ្រដល់ក្រុមតំណាងរបស់ខ្លួន គឺ​ហេសបូឡា ប្រសិនបើអ៊ីស្រាអែលបន្ត ឬបង្កើនការវាយប្រហារ នៅទីនោះ។

ប្រធានាធិបតីលីបង់ លោក Joseph Aoun បាននិយាយនៅ​ថ្ងៃព្រហស្បតិ៍ (ទី៤ ខែមិថុនា ឆ្នាំ២០២៦) នេះ​ថា បទឈប់បាញ់នឹងចូលជាធរមាន ក្នុងរង្វង់​រយៈពេល ២៤ម៉ោង បន្ទាប់ពីភាគីពាក់ព័ន្ធទាំងអស់អនុម័តវា ដោយហាក់ដូចជាសំដៅទៅលើក្រុមហេសបូឡាដែលមិនបានធ្វើអត្ថាធិប្បាយ ជុំវិញ​កិច្ចព្រមព្រៀងនេះ​ឡើយ​។

កិច្ចព្រមព្រៀងនេះកើតឡើងបន្ទាប់ពីមាន​ការផ្ទុះឡើងនូវ​អំពើហិង្សា នៅទូទាំងតំបន់។ ការវាយប្រហាររបស់អ៊ីស្រាអែល បានសម្លាប់មនុស្សយ៉ាងហោចណាស់ ៦នាក់ នៅភាគខាងត្បូងលីបង់ ហើយកងកម្លាំងសហរដ្ឋអាមេរិក និងអ៊ីរ៉ង់ បានវាយប្រហារគ្នាទៅវិញទៅមក នៅឈូងសមុទ្រ កាលពីថ្ងៃពុធ ដែលជាការប្រយុទ្ធគ្នាដ៏ខ្លាំងក្លាបំផុតមួយ ចាប់តាំងពីបទឈប់បាញ់ដាច់ដោយឡែកមួយទៀត​ បានបញ្ឈប់ការទម្លាក់គ្រាប់បែកទ្រង់ទ្រាយធំរបស់សហរដ្ឋអាមេរិក-អ៊ីស្រាអែលលើអ៊ីរ៉ង់ កាល​ពី​ដើមខែមេសា។

កាល​ពី​សប្តាហ៍​មុន អ៊ីរ៉ង់ និង​សហរដ្ឋ​អាមេរិក ​បាន​បង្ហាញ​ពី​វឌ្ឍនភាព​ឆ្ពោះ​ទៅ​រក​កិច្ចព្រមព្រៀង​ដំបូង​បណ្ដោះអាសន្ន​មួយ​ ដើម្បី​បញ្ឈប់​សង្គ្រាម និង​បើក​ច្រក​សមុទ្រ​ឡើង​វិញ ប៉ុន្តែ​ភាគី​ទាំង​២ ​មិន​ទាន់​បាន​ចុះ​ហត្ថលេខា​លើ​កិច្ចព្រមព្រៀង​នេះ​នៅ​ឡើយ​ទេ ដែល​នឹង​ទុក​ឲ្យ​ការ​ចរចា​កាន់តែ​ស្មុគស្មាញបន្ថែម​ទៀត​ ​សម្រាប់​ពេល​ក្រោយ៕