រដ្ឋជាសមាជិករបស់​សហភាព​អឺរ៉ុប (EU) ចំនួន ១១ បានជំរុញឲ្យ​គណៈកម្មការអឺរ៉ុបដាក់កម្រិត និងមានចំណង​ផ្លូវ​ច្បាប់​កាន់តែតឹងរ៉ឹង ចំពោះ​ការ​ផ្ដល់​ទិដ្ឋាការ Schengen សម្រាប់ពលរដ្ឋរុស្ស៊ី ដោយលើកឡើងពីក្ដី​បារម្ភ អំពីសន្តិសុខ និងកម្រិតខ្ពស់នៃការធ្វើដំណើរទេសចរណ៍ជាបន្តបន្ទាប់ ទោះបីជាមានសង្គ្រាមរបស់រុស្ស៊ី នៅអ៊ុយក្រែនក៏ដោយ។

នៅក្នុងលិខិតរួមមួយផ្ញើទៅកាន់ប្រធានគោលនយោបាយការបរទេសរបស់ EU លោកស្រី Kaja Kallas និងស្នងការទេសន្តរប្រវេសន៍ លោក​ Magnus Brunner រដ្ឋាភិបាលនៃប្រទេសប៉ូឡូញ ស៊ុយអែត សាធារណរដ្ឋឆេក ដាណឺម៉ាក អេស្តូនី ហ្វាំងឡង់ ឡាតវី លីទុយអានី ហូឡង់ ន័រវ៉ែស និងអ៊ីស្លង់ បានអំពាវនាវឲ្យ​មានវិធីសាស្រ្តឯកភាព​​គ្នា​បន្ថែមទៀត ចំពោះជនជាតិរុស្ស៊ី។

លិខិតនេះ ដែលត្រូវបានផ្សាយ​ដោយទូរទស្សន៍ប៉ូឡូញ TVP World ត្រូវបានចុះហត្ថលេខាដោយរដ្ឋមន្ត្រីការបរទេស លោក Radoslaw Sikorski និងរដ្ឋមន្ត្រីក្រសួងមហាផ្ទៃ លោក​ Marcin Kierwinski របស់​ប្រទេស​ប៉ូឡូញ​។

រដ្ឋមន្ត្រីទាំង​នោះ​បានរៀប​រាប់​ថា «នៅក្នុង​ពេល​វេលា​មាន​ការប្រឈមមុខដាក់គ្នាខាងភូមិសាស្ត្រនយោបាយ កម្លាំងរបស់ EU ត្រូវ​ស្ថិតនៅក្នុងឯកភាព» ដោយផ្ដល់​ហេតុផល​ថា វិធីសាស្រ្តរួមមួយ គឺត្រូវការជាចាំបាច់ ដើម្បីធានាប្រសិទ្ធភាពនៃគោលនយោបាយការបរទេស និងគោលនយោបាយទណ្ឌកម្មរបស់ប្លុក​។

ប្រទេសទាំងនោះបានឲ្យ​ដឹង​ទៀត​ថា ពួកគេមានក្ដី​បារម្ភ អំពីចំនួនអ្នកទេសចររុស្ស៊ីដែលធ្វើដំណើរទៅកាន់អឺរ៉ុប ខណៈពេលដែលទីក្រុងមូស្គូបន្តសង្គ្រាមរបស់ខ្លួន នៅប្រទេស​អ៊ុយក្រែន៕