នៅ​ថ្ងៃព្រហស្បតិ៍ (ទី៤ ខែមិថុនា ឆ្នាំ២០២៦) នេះ មេបញ្ជាការនៃកងកម្លាំង Quds នៃកងឆ្មាំបដិវត្តន៍ឥស្លាម (IRGC) បានអំពាវនាវឲ្យ​អ៊ីស្រាអែលដកទ័ពចេញពីទីតាំងដែលខ្លួនកាន់កាប់ នៅប្រទេស​លីបង់ មុនពេល​សង្គ្រាមអាមេរិក-អ៊ីស្រាអែល ផ្ទុះឡើងលើ​អ៊ីរ៉ង់។

នៅក្នុងសុន្ទរកថាដែលត្រូវបាន​ផ្សាយ​ដោយទីភ្នាក់ងារសារព័ត៌មានពាក់កណ្តាលផ្លូវការ Tasnim លោក Esmail Qaani បាននិយាយថា៖ «ការគាំទ្រដល់ចលនាតស៊ូ នៅប្រទេសលីបង់ គឺជាកាតព្វកិច្ចសម្រាប់ប្រជាជនមូស្លីមទាំងអស់ ហើយការដកទ័ព​របស់​អ៊ីស្រាអែលចេញពីតំបន់នេះ គឺជាគោលបំណងដែលអាចសម្រេចបាន»។

លោកបានបន្ថែមថា៖ «គោល​ដៅចម្បង​​នៃការទាមទាររបស់ក្រុមតស៊ូនេះ​ គឺការដកទ័ពរបស់​របបកាន់កាប់ (អ៊ីស្រាអែល) ទៅកាន់ទីតាំងដែលខ្លួនកាន់កាប់ មុនសង្គ្រាម ៤០​ថ្ងៃចាប់ផ្តើម»។ លោក Qaani បានសង្កត់​ធ្ងន់​ថា ពួកយុទ្ធជនលីបង់ នឹងឃើញលទ្ធផលឆាប់​ៗនៃអ្វីដែលលោកបានពិពណ៌នាថា ជា «ការតស៊ូដ៏រឹងមាំ» របស់ពួកគេ។

គួរ​បញ្ជាក់ថា កងទ័ពអ៊ីស្រាអែលបានបញ្ជាក់​នៅ​ថ្ងៃព្រហស្បតិ៍ថា ខ្លួននឹងបន្តការវាយលុករបស់ខ្លួន នៅភាគខាងត្បូងនៃ​ប្រទេសលីបង់ ទោះបីជាមានសេចក្តីប្រកាសត្រីភាគីដែលត្រូវបាន​ចេញនៅទីក្រុងវ៉ាស៊ីនតោន សហរដ្ឋ​អាមេរិក​ កាលពីថ្ងៃពុធ ដោយប្រកាសពីកិច្ចព្រមព្រៀង ស្តីពីបទឈប់បាញ់ក៏ដោយ។ អ៊ីស្រាអែលកាន់កាប់តំបន់នៅភាគខាងត្បូងលីបង់ ដែលតំបន់​ខ្លះមានតាំងពីច្រើនទសវត្សរ៍មុន និងខ្លះទៀតមានតាំងពីជម្លោះឆ្នាំ ២០២៣-២០២៤។

ក្នុងអំឡុងពេលនៃការវាយលុកបច្ចុប្បន្ន កងកម្លាំងអ៊ីស្រាអែលបានរុលទៅមុខ​ជាង ១០គីឡូម៉ែត្រចូលទៅក្នុងទឹកដីលីបង់ ដែលជាការឈ្លានពានជ្រៅបំផុត ចាប់តាំងពីឆ្នាំ២០០០ មក​៕