ភ្នំពេញ៖ មន្ត្រីជាន់ខ្ពស់ក្រសួងការបរទេសបានបញ្ជាក់ថា កម្ពុជាបានជ្រើសរើសអ្នកផ្សះផ្សាចំនួនពីររូបរួចហើយដែលជាអ្នកច្បាប់ល្បីៗ ហើយភាគីថៃមានរយៈពេល ២១ថ្ងៃ ដើម្បីជ្រើសរើសអ្នកផ្សះផ្សាចំនួនពីររូបដែរ ដើម្បីពួកគេឈានទៅជ្រើសរើសប្រធានដែលជាមាជិកទី៥ ហើយបង្កើតទៅជាគណកម្មការនៃអ្នកផ្សះផ្សាសម្រាប់ការផ្ដល់យោបល់ និងអនុសាសន៍លើការដោះស្រាយដោយសន្ដិវិធីជុំវិញបញ្ហាព្រំដែនសមុទ្រកម្ពុជា និងថៃ។

ឯកឧត្តម ចាន់ រតនា អ្នកនាំពាក្យក្រសួងការបរទេសកម្ពុជា បានបញ្ជាក់ប្រាប់ BTV ថា ៖ “យើងអត់ផ្សាយឈ្មោះចេញទេ អ្នកដែលផ្សាយឈ្មោះចេញមិនដឹងគាត់បានពីណាមក យើងបានជ្រើសរើសហើយឥស្សរជនដែលឆ្នើមពីររូបទាំងចំណេះដឹងទាំងបទពិសោធន៍ ឈ្មោះមិនទាន់ជូនបានទេ ដោយសុំរក្សាទុកនៅអត្តសញ្ញាណរបស់គាត់ ឥស្សរជនឆ្នើមទាំងពីររូបជាជនជាតិបរទេស ជនជាតិដាណឺម៉ាក និងបារាំង”។

អ្នកនាំពាក្យក្រសួងការបរទេសបានបន្តថា ថៃមានពេល២១ថ្ងៃក្នុងការសម្រេចតែងតាំងគណៈកម្មការ ឬក៏ចៅក្រមចំនួន ២រូបដែរ បើសិនជាគាត់មិនតែងតាំងទេ អគ្គេលេខាធិការអង្គការសហប្រជាជាតិគេនឹងតែងតាំងជំនួស។ ហើយបានគណៈកម្មការទាំង៤រូប ឬហៅថាចៅក្រមទាំង ៤រូប គាត់នឹងធ្វើការរើសរកប្រធានម្នាក់ទៀត គ្រប់៥រូប។ នៅពេលដែលបង្កើតបានគណៈកម្មការទាំង៥រូបហើយ គឹនឹងចាប់ផ្តើមដំណើរការ។

ឯកឧត្តម ឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេសកម្ពុជាបានថ្លែងប្រាប់ BTV ថា ក្រោយកម្ពុជាជូនដំណឹងផ្លូវការទៅភាគីថៃ និង UN អំពីការចាប់ផ្តើមដំណើរការយន្តការផ្សះផ្សាដោយបង្ខំក្រោមអនុសញ្ញា UNCLOS, រយៈពេលបីសប្ដាហ៍ខាងមុខភាគីថៃត្រូវឆ្លើយតបចំពោះការជូនដំណឹងជាផ្លូវការរបស់កម្ពុជា។ ខណៈពេលនេះកម្ពុជាបានជ្រើសរើសអ្នកផ្សះផ្សាចំនួនពីររូបរួចហើយដែលជាអ្នកច្បាប់ល្បីៗ ហើយភាគីថៃក៏ត្រូវជ្រើសរើសអ្នកផ្សះផ្សាចំនួនពីររូបដែរ ដើម្បីពួកគេឈានទៅជ្រើសរើសប្រធានដែលជាមាជិកទី៥ ហើយបង្កើតទៅជាគណកម្មការនៃអ្នកផ្សះផ្សាសម្រាប់ការផ្ដល់យោបល់ និងអនុសាសន៍លើការដោះស្រាយដោយសន្ដិវិធីជុំវិញបញ្ហាព្រំដែនសមុទ្រកម្ពុជា និងថៃ។

សូមជម្រាបថា នៅថ្ងៃទី២ ខែមិថុនា ឆ្នាំ២០២៦នេះ តាមរយៈសារពិសេស សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃព្រះរាជាណាចក្រកម្ពុជា បានបញ្ជាក់ថា ពាក់ព័ន្ធនឹងការទាមទារដែនសមុទ្រត្រួតស៊ីគ្នាជាមួយប្រទេសថៃ កម្ពុជាបានផ្ញើលិខិតជូនដំណឹងជាផ្លូវការទៅកាន់ភាគីថៃ និងអគ្គលេខាធិការអង្គការសហប្រជាជាតិ (UN) ដើម្បីចាប់ផ្ដើមដំណើរការនៃយន្តការការផ្សះផ្សារដោយចាប់បង្ខំ (Compulsory Conciliation) ដែលស្ថិតក្រោមអនុសញ្ញាអង្គការសហប្រជាជាតិស្តីពីនីតិសមុទ្រ (UNCLOS)៕

អត្ថបទ៖ វង្ស សុភាព