លោក Park Gyeong-je បានចាប់ផ្តើមចិញ្ចឹមឃ្មុំ កាលពីរយៈពេលជិត ៥ទសវត្សរ៍មុន ដែលផ្តើមចេញពីចំណង់ចំណូលចិត្តស្រលាញ់ធម្មជាតិរបស់លោក ។

បច្ចុប្បន្នលោកគ្រប់គ្រងកសិដ្ឋានចិញ្ចឹមឃ្មុំផ្លាស់ទី នៅស្រុកភាគខាងត្បូងរបស់កូរ៉េខាងត្បូង Sancheong ។ នេះមានន័យថា បុរសវ័យ ៦៥ឆ្នាំម្នាក់នេះ ត្រូវនាំឃ្មុំរបស់លោកដែលនៅជាមួយលោកទៅកាន់ផ្ការីកនៅទូទាំងស្រុក ។

ក្រៅពីផលិតទឹកឃ្មុំ សត្វទាំងនេះ ដើរតួយ៉ាងសំខាន់ក្នុងការក្រេបលម្អងដំណាំរបស់កសិករផងដែរ ប៉ុន្តែបម្រែបម្រួលអាកាសធាតុកាលពីពេលថ្មីៗនេះ បានបង្អាក់ដល់ប្រតិបត្តិការរបស់អ្នកចិញ្ចឹមឃ្មុំ ។

លោក Gyeong-je និយាយថា បច្ចុប្បន្ន ដោយសារតែបម្រែបម្រួលអាកាសធាតុ វាពិបាកឲ្យកសិករចិញ្ចឹមឃ្មុំរស់រានខ្លាំងណាស់ ។

លោកបន្តថា កាលពីមុន មាននូវភាពខុសប្លែកគ្នាច្រើនរវាងអាកាសធាតុនៅតំបន់ភាគខាងត្បូង និងតំបន់ភាគកណ្តាល ដូច្នេះហើយវាល្អខ្លាំងណាស់ សម្រាប់ការផលិតទឹកឃ្មុំ ប៉ុន្តែបច្ចុប្បន្ន ការឡើងកម្តៅផែនដី ផ្កាគ្រប់ប្រភេទទាំងអស់រីកតែម្តងគត់នៅទូទាំងប្រទេស ។

លោកនិយាយទៀតថា ផ្កាឆាប់រីកផងដែរ ហើយមានរយៈពេលខ្លីជាងមុន ដោយសារការកើនឡើងសីតុណ្ហភាព ។

លោក Park ធ្លាប់ដើរប្រមូលទិន្នផលទឹកឃ្មុំរបស់លោក ៤ដងនៅទូទាំងប្រទេស ក្នុង ១ឆ្នាំ ប៉ុន្តែផ្ការីកមុនរដូវ បានកាត់បន្ថយចំនួនបង្គងទឹកឃ្មុំរបស់លោកមកនៅត្រឹមពាក់កណ្តាល ធ្វើឲ្យវាប៉ះពាល់យ៉ាងខ្លាំងដល់ការប្រមូលទិន្នផលទឹកឃ្មុំរបស់លោក ៕