លោកប្រធានាធិបតី Volodymyr Zelenskyy បានសន្យាកាលពីថ្ងៃព្រហស្បតិ៍ ៤មិថុនាសប្ដាហ៍នេះថា អ៊ុយក្រែននឹងរក្សាពេលវេលាច្បាស់លាស់ក្នុងការចរចាស្តីពីការចូលរួមជាមួយសហភាពអឺរ៉ុប និងក្នុងការប្រកាន់ខ្ជាប់នូវកាតព្វកិច្ចរបស់ខ្លួនជាមួយប្លុកដែលមានសមាជិក២៧ប្រទេសមួយនេះ។

លោក Zelenskyy បានថ្លែងសុន្ទរកថាបែបនេះ មួយថ្ងៃបន្ទាប់ពីតំណែងប្រធានប្តូរវេនរបស់សហភាពអឺរ៉ុបក្រោមការដឹកនាំរបស់ប្រទេសកោះស៊ីប បាននិយាយថា ខ្លួនបានចាប់ផ្តើមរៀបចំដើម្បីបើកការចរចាលើក្រុមដំបូងនៃជំពូកចរចាជាមួយអ៊ុយក្រែន និងប្រទេសជិតខាងម៉ុលដាវី។ ជំពូកទីមួយគ្របដណ្តប់លើនីតិរដ្ឋ និងស្តង់ដារប្រជាធិបតេយ្យ។

ប្រធានាធិបតីអ៊ុយក្រែនរូបនេះ បានថ្លែងនៅក្នុងសុន្ទរកថាវីដេអូពេលយប់របស់លោកថា ពួកលោកនឹងមានកាលវិភាគច្បាស់លាស់សម្រាប់ការឈានទៅមុខក្នុងការចរចាទាំងនេះ ជាពិសេសបន្ទាប់ពីការផ្លាស់ប្តូរនៅក្នុងប្រទេសហុងគ្រី។

ពួកលោកបានរក្សាកាលវិភាគ ហើយឥឡូវនេះនៅក្នុងខែមិថុនា ពួកលោករំពឹងយ៉ាងខ្លាំងចំពោះការបើកការចរចាជាក្រុម ដែលអ៊ុយក្រែនបានរៀបចំ។ ពួកលោកបានធ្វើការងាររបស់ខ្លួនរួចរាល់ហើយ។ ជំហានបន្ទាប់គឺអាស្រ័យលើសហភាពអឺរ៉ុប។

កិច្ចព្រមព្រៀងដើម្បីបន្តការចរចានេះបានកើតឡើងបន្ទាប់ពីការប្រកាសរបស់នាយករដ្ឋមន្ត្រីហុងគ្រី លោក Peter Magyar ថាប្រទេសរបស់លោកបានឈានដល់កិច្ចព្រមព្រៀងជាមួយទីក្រុងគីវលើសិទ្ធិរបស់សហគមន៍ជនជាតិភាគតិចហុងគ្រីចំនួន ១០០.០០០ នាក់របស់អ៊ុយក្រែន។

លោក Magyar ធ្លាប់បាននិយាយថាកិច្ចព្រមព្រៀងលើជម្លោះដ៏យូរអង្វែងនេះគឺមានសារៈសំខាន់ប្រសិនបើទីក្រុង Budapest យល់ព្រមឱ្យអ៊ុយក្រែនចូលរួមជាមួយសហភាពអឺរ៉ុប។ អ្នកកាន់តំណែងមុនរបស់លោក Magyar គឺអ្នកជាតិនិយម លោក Viktor Orban បានប្រឆាំងនឹងសមាជិកភាពរបស់អ៊ុយក្រែនក្នុងសហភាពអឺរ៉ុប៕