ទីភ្នាក់ងារនុយក្លេអ៊ែររបស់អង្គការសហប្រជាជាតិ បានបញ្ជាក់ជាថ្មីនៅក្នុងរបាយការណ៍សម្ងាត់មួយដែលសារព័ត៌មាន AFP បានឃើញកាលពីថ្ងៃព្រហស្បតិ៍ ទី៤ មិថុនា ថា កង្វះដំណើរការទទួលបានព័ត៌មានសម្ភារៈនុយក្លេអ៊ែររបស់អ៊ីរ៉ង់ បានបង្កឱ្យមាន «ការព្រួយបារម្ភអំពីការរីកសាយអាវុធនុយក្លេអ៊ែរ» ហើយបានអំពាវនាវឱ្យទីក្រុងតេអេរ៉ង់ធ្វើសកម្មភាពដោយការស្ថាបនា។

ប្រភពការទូតបាននិយាយថា ទីភ្នាក់ងារថាមពលអាតូមិកអន្តរជាតិ (IAEA) មិនបានមើលឃើញសកម្មភាពណាមួយនៅទីតាំងនុយក្លេអ៊ែរសំខាន់ៗនោះទេ ដោយធ្វើការវិនិច្ឆ័យពីរូបភាពផ្កាយរណបចាប់តាំងពីការចាប់ផ្តើមសង្គ្រាមនៅតំបន់មជ្ឈិមបូព៌ា។ ប៉ុន្តែ ទីភ្នាក់ងារ IAEA មិនអាចចូលទៅកាន់ទីតាំងនុយក្លេអ៊ែរសំខាន់ៗមួយចំនួននៅក្នុងប្រទេសអ៊ីរ៉ង់បានទេចាប់តាំងពីអ៊ីស្រាអែលដែលចូលរួមដោយសហរដ្ឋអាមេរិក ចាប់ផ្តើមជម្លោះរយៈពេល១២ថ្ងៃកាលពីខែមិថុនា ឆ្នាំ២០២៥ ដែលរួមមានទាំងការវាយប្រហារលើទីតាំងនុយក្លេអ៊ែរ។

រោងចក្រនុយក្លេអ៊ែរ ត្រូវបានវាយប្រហារនៅក្នុងសង្គ្រាមដែលបានផ្ទុះឡើងនៅថ្ងៃទី ២៨ ខែកុម្ភៈ។ ទីភ្នាក់ងារ IAEA បានជំរុញដដែលៗឱ្យមានការចូលទៅដល់ទីតាំងនោះ។ យោងតាមសេចក្តីរាយការណ៍របស់CNN រូបភាពផ្កាយរណបបង្ហាញថា អ៊ីរ៉ង់បានបើកច្រកផ្លូវរូងក្រោមដីចំនួន៥០កន្លែងក្នុងចំណោមច្រកផ្លូវរូងក្រោមដីចំនួន៦៩កន្លែង ដែលត្រូវបានទម្លាក់គ្រាប់បែកដោយសហរដ្ឋអាមេរិក និងអ៊ីស្រាអែលនៅរោងចក្រផលិតមីស៊ីលក្រោមដីចំនួន១៨កន្លែង។

ទីភ្នាក់ងារ IAEA បាននិយាយនៅក្នុងរបាយការណ៍ថា «ខណៈទីភ្នាក់ងារ បានទទួលស្គាល់ថា ការវាយប្រហារដោយយោធាលើរោងចក្រ និងទីតាំងនុយក្លេអ៊ែររបស់អ៊ីរ៉ង់ បានបង្កើតស្ថានភាពមិនធ្លាប់មានពីមុនមក ដែលវាមានសារៈសំខាន់សម្រាប់ទីភ្នាក់ងារក្នុងការធ្វើសកម្មភាពពិនិត្យផ្ទៀងផ្ទាត់នៅក្នុងប្រទេសអ៊ីរ៉ង់ដោយមិនពន្យាពេល»។ របាយការណ៍នេះនឹងត្រូវពិភាក្សានៅក្នុងកិច្ចប្រជុំក្រុមប្រឹក្សារបស់ទីភ្នាក់ងារ IAEA នៅសប្តាហ៍ក្រោយ។