​វាយ​កូន​បាល់៖ ​កីឡាករ​វាយ​កូន​បាល់​រុស្ស៊ី​លំដាប់​លេខ ៨ ពិភពលោក Andrey Rublev បាន​និយាយ​ថា ការហាមឃាត់​មិនឱ្យ​អត្ត​ពលិកម​ក​ពី​រុស្ស៊ី និងបេឡា​រុស​ចូលរួម​ការប្រកួត grand Slam, Wimbledon គឺជា​រៀង​រើសអើង​ជាតិ​សាសន៍​យ៉ាងច្បាស់ និង​មិន​សម​ហេតុផល​។

​​អត្ត​ព​លិ​ក​នៃ​ជាតិ​សាសន៍​ទាំង២ មិនត្រូវ​បានអនុញ្ញាត​ឱ្យចូល​រួមការ​ប្រកួត​វាយ​កូន​បាល់ Grand Slam, Wimbledon ឡើយ​ដោយសារតែ​សង្គ្រាម​រុស្ស៊ី​មកលើ​អ៊ុយ​ក្រែ​ន​។​ ​Andrey Rublev បាន​និយាយ​ថា ហេតុផល​ដែល​ហាមប្រាម​នេះ​មិន​សម​សោះ ជាក់ស្តែង​វា​ជា​រឿង​រើសអើង​ជាតិ​សាសន៍​យ៉ាង​ច្បាស់​។ នេះ​ជា​សកម្មភាព​មួយ​ដែល​មិនអាច​ទទួលយកបាន ដែលជា​គំរូ​មិនល្អ​នៃ​ភាពស្រស់​បំព្រង​នៃ​កីឡា ការជំរុញឱ្យ​មានការ​ស្អប់​គ្នា បែងចែក​មិន​ដាច់​រវាង​កីឡា និង​នយោបាយ​។ ​ការ​លើក​របស់ Rublev នេះ​បន្ទាប់ពី​គេ​បាន​យកឈ្នះ​កីឡាករ​ឆេ​ក Jiri Lehecka នៅ​ការប្រកួត​ពានរង្វាន់ Serbian Open​។ ​សូមបញ្ជាក់ថា កីឡាករ-កីឡាការិនី​លំដាប់​កំពូល​ជាច្រើន​នាក់​នឹង​អវត្តមាន​ពី​ការ​ប្រកួត Grand Slam, Wimbledon ឆ្នាំនេះ​ដោយសារ​ជាតិ​សាសន៍​របស់​ពួកគេ​រួមមាន​ដូចជា៖ កីឡាករ​លំដាប់​លេខ ២ ពិភពលោក Daniil Medvedev, កីឡា​ករលេខ ៨ Andrey Rublev និង​កីឡា​ករលេខ ២៦ Karen Khachanov ជាដើម​។

​​ចំណែក​ផ្នែក​នារី​រួមមានកីឡាការិនី​លេខ ៤ ពិភពលោក​បេឡា​រុស Aryna Sabalenka, កីឡាការិនី​លេខ ១៥ រុស្ស៊ី Anastasia Pavlyuchenkova និង​កីឡាការិនី​បេឡា​រុស Victoria Azarenka ជាដើម​។ ​​ព្រឹត្តិការណ៍ Grand Slam, Wimbledon នឹង​ចាប់ផ្តើម​នៅ​ថ្ងៃទី២៧ ខែមិថុនា​ដល់​ថ្ងៃទី១០ ខែកក្កដា​។ ​​យ៉ាងណាក្តីព្រឹត្តិការណ៍ Grand Slam, French Open ដែល​នឹង​ចាប់ផ្តើម​មុន​នៅ​ខែឧសភា​នោះ មិនមាន​ការហាមឃាត់​លើ​ជាតិ​សាសន៍​ណា​ឡើយ​៕

​អត្ថបទ​៖​នាង សុភា​វុ​ធ