​អ៊ុយក្រែន៖ នាយករដ្ឋមន្ត្រី​អេ​ស្ប៉ា​ញ​លោក Pedro Sanchez និយាយ​កាលពី​ថ្ងៃ​ព្រហស្បតិ៍​ថា ប្រទេស​អេស្ប៉ាញបាន​បង្កើន​ការគាំទ្រ​ផ្នែក​យោធា​របស់ខ្លួន​ទ្វេដង​ដល់​អ៊ុយ​ក្រែ​ន ហើយ​សហភាព​អឺរ៉ុប​ឈរ​រួបរួម​ជាមួយ​អ៊ុយ​ក្រែ​ន​។​

​ថ្លែង​នៅក្នុង​ទីក្រុង​គី​វក្នុង​សន្និសីទ​សារព័ត៌មាន​រួមគ្នា​ជាមួយ​ប្រធានាធិបតី​អ៊ុយ​ក្រែ​នលោក Volodymyr Zelenskyy និង​នាយករដ្ឋមន្ត្រី​ដា​ណឺ​ម៉ាក​លោកស្រី Mette Frederiksen លោក Sanchez បានប្រកាសថា នាវា​កងទ័ពជើងទឹក​អេ​ស្ប៉ា​ញកំពុង​ដឹក​ជំនួយ​យោធា​ថ្មីធ្វើដំណើរ​ទៅកាន់​ប្រទេស​ប៉ូឡូញ​។​ ​លោក Sanchez និយាយថា​ ថ្ងៃនេះ​ពី​ទីក្រុង​គី​វ ខ្ញុំ​ចង់​និយាយ​ទៅកាន់​ប្រជាជន​អ៊ុយ​ក្រែ​នទាំងអស់​ថា អ្នក​មិន​នៅ​ម្នាក់ឯង​នោះទេ សហភាព​អឺរ៉ុប​នៅ​ជាមួយ​អ្នក​។​

​លោកស្រី Frederiksen នាយករដ្ឋមន្ត្រី​ដា​ណា​ម៉ាកនិយាយថា ​ប្រទេស​ដា​ណឺ​ម៉ាក​នឹង​បរិច្ចាគទឹកប្រាក់ ៦០០លាន​ក្រូ​ន័​រស្មើរ​នឹង ៨៧.៤លាន​ដុល្លារដោយ​ចាត់ទុក​ជំនួយ​នេះ​ថា ​ជាការរួមចំណែក​សំខាន់​ថ្មី​។​ ​លោក Frederiksen និយាយ​ថា ​ការ​ផ្តល់ជំនួយ​ផ្នែក​យោធា​សរុប​របស់​ប្រទេស​ដា​ណឺ​ម៉ាក នាពេលនេះ​មាន​ចំនួន​សរុប ១ពាន់​លាន​ក្រូ​ន័​រ​។​ ​ប្រទេស​ដា​ណឺ​ម៉ាកនឹង​ជួយ​អ៊ុយ​ក្រែ​ន​ក្នុងការ​បោសសម្អាត​គ្រាប់មីន​ នៅក្នុង​តំបន់​ដែល​ស្ថិតនៅក្រោម​ការគ្រប់គ្រង​រប​ស់អ៊ុយ​ក្រែ​ន​៕

អត្ថបទ៖ ប៊ុនថន