​ស្នូកឃ័រ៖ ​អតីត​ជើងឯក​ស្នូកឃ័រ​ពិភពលោក Judd Trump បាន​បន្តដំណើរ​ឡើង​ជុំ​ទី២ ហើយ​ក្រោយ​ទម្លាក់​កីឡាករ​អ៊ីរ៉ង់ Hossein Vafaei ដែល​បង្ហាញខ្លួន​លើកដំបូង​នៅ​ព្រឹត្តិការណ៍​នេះ​។ ​កីឡាករ​វ័យ ៣២ឆ្នាំ Judd Trump ហាក់​មិនបាន​បង្ហាញ​ទំរង់​លេង​ល្អ​របស់ខ្លួន​ឡើយ​នៅ ៣ហ្វ្រេ​ម​ដំបូង​តែ​ក៏បាន​នាំមុខ ៦-៣ហ្វ្រេ​ម​ក្រោយ​ចប់​ដំណាក់កាល​ដំបូង​។

​​ដំណាក់កាល​ទី២ ជើងឯក​ពិភពលោក​ឆ្នាំ២០១៩ រូបនេះ​ក៏បាន​យកឈ្នះ ៤ ក្នុង ៥ហ្វ្រេ​ម​ចុងក្រោយ​ដើម្បី​យកឈ្នះ​ក្នុង​លទ្ធផល​សរុប ១០-៤ហ្វ្រេ​ម​។ ​ជុំ​បន្ត​កីឡាករ​អង់គ្លេស​រូបនេះ​នឹង​ជួប​ជាមួយ​កីឡាករ​ស្កុ​ត​ឡេ​ន Anthony McGill​។​ ចំណែក​ជើង ៣សម័យ Mark Williams បាន​នាំមុខ​កីឡា​ករវែល Jackson Page ៧-១ហ្វ្រេ​ម​ដំណាក់កាល​ដំបូង​ក្នុងការ​ប្រកួត​ជុំ​ទី២ ខណៈ​ដំណាក់កាល​ទី២ បន្ត​ថ្ងៃ​សុក្រ​នេះ កីឡាករ​វ័យ ៤៧ឆ្នាំ Mark Williams ត្រូវការ ៦ហ្វ្រេ​ម​ទៀត​ដើម្បី​បន្តដំណើរ​ឡើង​ជុំ​ទី៣​។​

​​ងាក​មក​កីឡាករ​ថៃ Noppon Saengkham ដែល​ឡើង​មកពី​វគ្គ​ជំ​រុះ​នោះបាន​ឈានឡើង​ជុំ​បន្ត​ផងដែរ ​ក្រោយ​យកឈ្នះ​កីឡាករ​ប៊ែ​ល​ហ្ស៊ិ​ក Luca Brecel ១០-៥ហ្វ្រេ​ម​។ ​ជុំ​បន្ត​កីឡាករ​ថៃ​រូបនេះ​នឹង​ជួប​ជាមួយ​ជើង​ខ្លាំង John Higgins នៅ​ថ្ងៃអាទិត្យ​នេះ​៕

​អត្ថបទ​៖​នាង សុភា​វុ​ធ