ភ្នំពេញ៖ ឯកឧត្តមបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា បានអំពាវនាវឲ្យមានការរៀបចំបន្ថែម និងជួយផ្សព្វផ្សាយឲ្យបានទូលំទូលាយ ពីតំបន់ទេសចរណ៍បរិស្ថាន ព្រោះថា បច្ចុប្បន្នកម្ពុជាមានផលប៉ះពាល់តិចតួចបំផុតពីផ្សែងពុល ដែលបរិយាកាសបែបនេះ ភ្ញៀវទេសចរបរទេសចូលចិត្ត ។

នៅក្នុងវេទិកាតុមូល ស្តីពីទេសចរណ៍កម្ពុជាក្នុងបរិបទកូវីដ-១៩ នៅថ្ងៃទី២២ ខែមេសា នេះ ២០២២ ឯកឧត្តមបណ្ឌិតសភាចារ្យ សុខ ទូច មានប្រសាសន៍ថា បច្ចុប្បន្ននៅកម្ពុជា មាន​ទេសចរណ៍​ចំនួនបី​ប្រភេទកំពុងមានភាពទាក់ទាញចំណាប់អារម្មណ៍ភ្ញៀវទេសចរបរទេស ក្នុងនោះ​មាន​ទេសចរណ៍​វប្បធម៌ ទេសចរណ៍ឆ្នេរ និងទេសចរណ៍​បរិស្ថាន​ ខណៈទេសចរណ៍វប្បធម៌ ទាក់ទាញ​ទេសចរ​ជាងគេ​។

ឯកឧត្តម បានបន្តថា នៅកម្ពុជា ពាក់ព័ន្ធទេសចរណ៍បរិស្ថាន ក៏មានសក្ដានុពលផងដែរ ដែល​ភាព​អំណោយផលនេះហើយ ​គួរធ្វើការរៀបចំ និងផ្សព្វផ្សាយបន្ថែមពី​ទេសចរណ៍បរិស្ថាន ព្រោះ​នៅកម្ពុជា ​គ្មានឧស្សាហកម្ម​ធុនធ្ងន់​ គ្មាន​ផ្សែង​ប៉ះពាល់​ធ្ងន់ធ្ងរ ។

ឯកឧត្តមបណ្ឌិតសភាចារ្យ ​បានបន្តថា ​ក្រៅពីទេសចរណ៍បីប្រភេទនេះ កម្ពុជានៅមានបីប្រភេទទៀត​នៅ​មិនទាន់ដំណើរការ ​គឺទេសចរណ៍ផលិតផល​ ទេសចរណ៍​សិប្បនិម្មិត​ និង​ទេសចរណ៍​សុខាភិបាល​ ដែលត្រូវខិតខំរៀបចំធ្វើឲ្យដំណើរការផងដែរ។

ដើម្បីឲ្យវិស័យទេសចរណ៍កាន់តែមានភាពទាក់ទាញ ស្រូបយកភ្ញៀវទេសចរ​បរទេស​កាន់តែច្រើន កម្ពុជា​គួរអនុវត្តនូវវិធានការមួយចំនួន ​មានការធានាបាននូវបរិស្ថាន ស្អាត ជំនាញវិជ្ជាជីវៈ និង​ក្រមសីលធម៌ ​ធានាបានតម្លៃ​សមរម្យ ​បដិសណ្ឋារកិច្ច ​ធានា​បាន​ភាពស្មោះត្រង់ កុំយកថវិកា​ពី​ភ្ញៀវពេលបំពេញពាក្យ ​រួមទាំង​ការកុំភូតកុហកភ្ញៀវរាល់​ការទិញវត្ថុ​អនុស្សាវរីយ៍ ​ជាដើម ។

ឯកឧត្តម សុខ ទូច បាន​ស្នើដល់ក្រសួង​ និងស្ថាប័នពាក់ព័ន្ធ​មិន​គួរ​អនុញ្ញាត​ឲ្យ​មាន​ការប្រើប្រាស់​កាំ​ភ្លើងបាញ់ទឹកជ័រ​ ឬផលិតផលលេងទឹកផ្សេងៗ​របស់បរទេស​ នៅក្នុងខេត្តសៀមរាប ជាដែន​ដី​វប្បធម៌​ដ៏សម្បូរបែប​របស់កម្ពុជា ​នៅពេលមានពិធីបុណ្យធំផ្សេងៗ ​ពិសេសបុណ្យចូលឆ្នាំ ដោយ​គួរ​ប្រើប្រាស់​ក្អមទឹក​ ឬឧបករណ៍អ្វីមួយជា​វត្ថុបុរាណ ​ស្រោច​ទឹក​ដាក់គ្នា ដែលវាបាន​បង្ហាញ​នូវ​អត្តសញ្ញាណ​របស់ជាតិ៕ អត្ថបទ៖ បាន សុខរិទ្ធិ