កោះតៃវ៉ាន់បានឲ្យដឹងថា ឆ្មាំល្បាតឆ្នេរតៃវ៉ាន់ និងចិន បានពាក់ព័ន្ធនឹងការប្រឈមមុខដាក់គ្នាដ៏តានតឹងមួយទៀត នៅជិតប្រជុំកោះ Pratas ដែលមានទីតាំងជាយុទ្ធសាស្ត្រ នៅផ្នែកខាងលើនៃសមុទ្រចិនខាងត្បូង នាថ្ងៃសុក្រ (ទី៥ ខែមិថុនា ឆ្នាំ២០២៦) នេះ ដែលជាលើកទី២ ក្នុងរយៈពេល ២សប្តាហ៍ សម្រាប់ករណីនេះ។
ប្រទេសចិនបានអះអាងថា កោះស្វ័យគ្រប់គ្រងដោយលទ្ធិប្រជាធិបតេយ្យមួយនេះ ជាទឹកដីរបស់ខ្លួន ជាជំហរដែលរដ្ឋបាលទីក្រុងតៃប៉ិបដិសេធ។ ទីក្រុងប៉េកាំងបានដាក់សម្ពាធលើកោះតៃវ៉ាន់ ដោយបង្កើនវត្តមានយោធារបស់ខ្លួន ជុំវិញកោះនេះ ក្នុងរយៈពេល ៥ឆ្នាំចុងក្រោយនេះ។
ដោយមានទីតាំងនៅចន្លោះ ភាគខាងត្បូងកោះតៃវ៉ាន់ និងទីក្រុងហុងកុង ប្រជុំកោះ Pratas ដែលគ្រប់គ្រងដោយតៃវ៉ាន់ ត្រូវបានអ្នកជំនាញសន្តិសុខមួយចំនួនមើលឃើញថា ងាយរងគ្រោះដោយសារការវាយប្រហាររបស់ចិន ដោយសារតែចម្ងាយរបស់ប្រជុំកោះនេះ ពោលគឺជាង ៤០០គីឡូម៉ែត្រ ពីកោះតៃវ៉ាន់។
ឆ្មាំល្បាតឆ្នេររបស់កោះតៃវ៉ាន់ បានឲ្យដឹងថា នៅព្រឹកថ្ងៃទី៥ ខែមិថុនានេះ ខ្លួនបានប្រទះឃើញនាវឆ្មាំល្បាតឆ្នេររបស់ចិន ដែលបន្ទាប់មក «បានរំលោភចូល» ទៅក្នុងដែនទឹកដែលមានការរឹតបន្តឹង នៅជុំវិញប្រជុំកោះ Pratas បន្ទាប់ពីបង្កើនល្បឿន និងបត់ភ្លាមៗ ខណៈពេលដែលមិនអើពើ ចំពោះការព្រមាននាវារបស់កោះតៃវ៉ាន់។
ឆ្មាំល្បាតឆ្នេរបានឲ្យដឹងថា នាវាទាំង២ នៅតែស្ថិតក្នុង «ការប្រឈមមុខដាក់គ្នា» ហើយកំពុងមាន «ការប្រើប្រាស់ពាក្យសម្ដីធ្ងន់ៗដាក់គ្នាទៅវិញទៅមក»។ ការិយាល័យទទួលបន្ទុកកិច្ចការកោះតៃវ៉ាន់របស់ចិន មិនបានឆ្លើយតបភ្លាមៗឡើយ ចំពោះសំណើសុំការអត្ថាធិប្បាយ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
