ក្រុមហេសបូឡាបានប្រាប់​ឲ្យ​ដឹង​នៅ​ថ្ងៃសុក្រ (ទី៥ ខែមិថុនា ឆ្នាំ២០២៦) នេះថា ក្រុមយុទ្ធជនរបស់ខ្លួនបានធ្វើការវាយប្រហារជាបន្តបន្ទាប់ដែលផ្តោតលើកងទ័ពអ៊ីស្រាអែល នៅជិតប្រាសាទ Beaufort នៅភាគខាងត្បូងនៃ​ប្រទេសលីបង់ ក្នុង​នោះ​រួមទាំងការវាយប្រហារដោយ «មីស៊ីលមាន​ប្រព័ន្ធ​នាំ​ផ្លូវ​» ផង​ដែរ​។

នៅក្នុងសេចក្តីថ្លែងការណ៍ដាច់ដោយឡែកជាច្រើន​ ក្រុមនៅ​លីបង់មួយ​នេះ​ បានឲ្យ​ដឹង​ថា ខ្លួនបានកំណត់គោលដៅកន្លែង​ប្រមូលផ្តុំរបស់​កងទ័ពអ៊ីស្រាអែល និងយានយន្តយោធា នៅជិតប្រាសាទប្រវត្តិសាស្ត្រ ដោយ​​ប្រើប្រាស់​មីស៊ីលមាន​ប្រព័ន្ធ​នាំផ្លូវ និងបានបាញ់ផ្លោងកាំភ្លើងធំលើតំបន់នោះចំនួន ៣ដង​ផ្សេងគ្នា។

ក្រុមនេះក៏បានឲ្យ​ដឹងផងដែរថា ក្រុមយុទ្ធជនរបស់ខ្លួន បានបំផ្ទុះឧបករណ៍ផ្ទុះ ប្រឆាំងនឹងកងកម្លាំងអ៊ីស្រាអែលដែលកំពុងព្យាយាមរុល​ទៅមុខនៅភាគខាងកើតនៃទីក្រុង Ghandouriyeh ដែលបណ្តាលឲ្យ​មាននូវ​អ្វីដែលខ្លួនពិពណ៌នាថា ជាការស្លាប់ និងរបួសដែលត្រូវបានបញ្ជាក់។

ក្រុមនេះបានបន្ត​ថា ក្រោយមក កងកម្លាំងអ៊ីស្រាអែល បានជម្លៀសអ្នករងរបួសនៅក្រោមផ្សែងដ៏​ក្រាស់ឃ្មឹក​ មុនពេលចាប់ផ្តើមបាញ់ផ្លោងកាំភ្លើងធំ និងការវាយប្រហារពី​លើ​អាកាស នៅ​តំបន់ជុំវិញ។ នៅព្រឹក​នេះ ក្រុមនេះបានបញ្ជាក់​ថា ខ្លួនបានធ្វើប្រតិបត្តិការចំនួន ២៥លើក ប្រឆាំងនឹងកងកម្លាំងអ៊ីស្រាអែលនៅភាគខាងត្បូងនៃ​ប្រទេសលីបង់ក្នុងរយៈពេល ២៤ម៉ោងមុននេះ ក្នុង​នោះ​រួមទាំងការវាយប្រហារដោយយានដ្រូន រ៉ូកែត និងការ​វាយ​ប្រហារ​ប្រឆាំងរថក្រោះ៕