សហរដ្ឋអាមេរិក កាល​ពី​ថ្ងៃព្រហស្បតិ៍ (ទី៤ ខែមិថុនា ឆ្នាំ២០២៦) បានដាក់ទណ្ឌកម្មលើប្រធានាធិបតីគុយបា លោក​ Miguel Diaz-Canel រួម​ជាមួយ​នឹង​បុគ្គល និងអង្គភាពពាក់ព័ន្ធមួយចំនួនទៀត​។ នេះបើយោងតាមគេហទំព័ររបស់ក្រសួងរតនាគារអាមេរិក។

ទណ្ឌកម្មទាំងនេះ ក៏បានកំណត់គោលដៅលើបុគ្គល​ ៤នាក់ផ្សេងទៀត និងអង្គភាពចំនួន ៥ ផង​ដែរ ក្នុង​នោះ​រួមទាំងភរិយារបស់លោក Diaz-Canel គឺលោកស្រី Lis Cuesta Peraza សមាជិក ២នាក់នៃគ្រួសារ Castro និងក្រសួងកងកម្លាំងប្រដាប់អាវុធបដិវត្តន៍។

រដ្ឋាភិបាលគុយបាមិនបានឆ្លើយតបភ្លាមៗឡើយ ចំពោះសំណើសុំការអត្ថាធិប្បាយ ជុំវិញ​ទណ្ឌកម្មនេះ។ លោក Diaz-Canel វ័យ​ ៦៦ឆ្នាំ បានធ្វើ​ជាប្រធានាធិបតីនៃប្រទេសការ៉ាអ៊ីបមួយ​នេះ ចាប់តាំងពីឡើងកាន់តំណែងជំនួស​លោក Raul Castro ដែលជាប្អូនប្រុសរបស់អតីតមេដឹកនាំគុយបា លោក Fidel Castro ក្នុងឆ្នាំ២០១៨។

ចំណាត់ការ​ប្រឆាំងនឹងលោក Diaz-Canel កាល​ពី​ថ្ងៃទី៤ ខែមិថុនានេះ​ គឺជាវិធានការ​ចុងក្រោយបំផុតរបស់​ទីក្រុងវ៉ាស៊ីនតោន ដើម្បីបង្កើនសម្ពាធលើមេដឹកនាំកុម្មុយនីស្តរបស់កោះនេះ។ ទណ្ឌកម្មទាំងនេះត្រូវបានប្រកាស ខណៈដែលប្រធានាធិបតីអាមេរិក លោក Donald Trump បានប្រាប់អ្នកសារព័ត៌មានថា សហរដ្ឋអាមេរិកចង់ឲ្យ​គុយបា «ក្លាយជាប្រទេសដែលមាន​ការ​គ្រប់គ្រងយ៉ាង​ល្អ»៕