ទីក្រុងគីវ បានកាន់ទុក្ខកុមារ ៧០៧នាក់ ដែលបានស្លាប់ អំឡុងសង្រ្គាមរយៈពេលជាង ៤ឆ្នាំ រវាងរុស្ស៊ី និងអ៊ុយក្រែន ខណៈការវាយប្រហាររបស់រុស្ស៊ីនៅទូទាំងប្រទេសអ៊ុយក្រែន បានសម្លាប់មនុស្ស ១២នាក់ ។

ការិយាល័យព័ត៌មាននគរបាលជាតិអ៊ុយក្រែន និយាយថា មនុស្សយ៉ាងហោច ៥នាក់ ត្រូវបានសម្លាប់ និងមនុស្ស ១១នាក់ផ្សេងទៀត បានរងរបួស នៅក្នុងការទម្លាក់គ្រាប់បែក និងការវាយប្រហារយានដ្រូនរបស់រុស្ស៊ី នៅតំបន់ភាគខាងកើត Donetsk របស់អ៊ុយក្រែន ។

ពួកគេនិយាយនៅក្នុងសារបង្ហោះលើបណ្តាញព័ត៌មានសង្គម Telegramថា ការតាំងលំនៅ ៧កន្លែង រងការវាយប្រហារនៅទីក្រុង Dobropillya, Druzhkivka, Kramatorsk, Mykolaivka និងទីក្រុង Sloviansk ហើយគោលដៅស៊ីវិល ៤២កន្លែង ត្រូវបានបំផ្លិចបំផ្លាញ រួមទាំងអគារស្នាក់នៅរបស់អ្នកស្រុក ១៦ខ្នងផងដែរ ។

ពួកគេបន្តថា ការខូចខាតហេដ្ឋារចនាសម្ព័ន្ធស៊ីវិល មានលក្ខណៈទ្រង់ទ្រាយធំ ក្នុងនោះអគារផ្ទះល្វែង ១៤ខ្នង និងរថយន្ត ១១គ្រឿង រងការខូចខាត ក៏ដូចជាស្ថាប័នវេជ្ជសាស្រ្ត ហើយរថយន្តជម្លៀសមនុស្ស និងរថយន្តគិលានសង្រ្គោះ ត្រូវបានបំផ្លិចបំផ្លាញផងដែរ ។

យោងតាមការអះអាងរបស់អភិបាលតំបន់ Kharkiv លោក Oleh Syniehubov បានឲ្យដឹងថា ការវាយប្រហារស្លាប់មនុស្សរបស់រុស្ស៊ី បានកើតមានក្នុងតំបន់របស់លោកដែលស្ថិតនៅភាគឦសានប្រទេសអ៊ុយក្រែន ។

លោកបន្តថា មនុស្ស ៣នាក់ ត្រូវបានសម្លាប់ និងមនុស្ស ២១នាក់ផ្សេងទៀត បានរងរបួស នៅក្នុងការវាយប្រហារយានដ្រូន និងមីស៊ីលរបស់រុស្ស៊ី ៕