ភ្នំពេញ៖ ឯកឧត្តមសាស្រ្តាចារ្យ ម៉ម ប៊ុនហេង រដ្ឋមន្រី្តក្រសួងសុខាភិបាល ស្នើដល់អង្គភាពសុខាភិបាល គ្រប់លំដាប់ថ្នាក់ត្រូវបន្តការយកចិត្តទុកដាក់តាមដានហានិភ័យសុខភាពសុខភាពសាធារណៈ នៃជំងឺកូវីដ១៩ ឲ្យបានជាប់ជាប្រចាំនិងមានវិធានការឆ្លើយតបជាបន្ទាន់ ក្នុងករណីផ្ទុះឆ្លងជំងឺកូវីដ១៩ ក្នុងសហគមន៍ ក្រោយពិធីបុណ្យចូលឆ្នាំប្រពៃណីជាតិ ដែលទើបកន្លងទៅថ្មីៗនេះ។

ការថ្លែងរបស់ឯកឧត្តម សាស្រ្តាចារ្យ ម៉ម ប៊ុនហេង យ៉ាងដូច្នេះ នាឱកាសបិទសិក្ខា​សាលា​ពិគ្រោះ​យោបល់ លើសេចកី្តព្រាងផែនការយុទ្ធសាស្រ្តសុខាភិបាលឆ្នាំ២០២២-២០៣០ និងយុទ្ធសាស្រ្តឌីជីថល សុខាភិបាល ឆ្នាំ២០៣០ ​កាលពីរសៀលថ្ងៃទី២១ ខែមេសា ឆ្នាំ២០២២។

ឯកឧត្តម រដ្ឋមន្រី្ត បានសង្កត់ធ្ងន់ថា ​ការឆ្លើយតប ​ជាបន្ទាន់ចំពោះករណីកូវីដ១៩នេះ គឺដើម្បី​រក្សា​ជីវភាព រស់នៅប្រចាំថ្ងៃរបស់ប្រជាពលរដ្ឋយើង ​និងកិច្ចដំណើរការ សកម្មភាពសង្គម សេដ្ឋកិច្ច​ពេញលេញ ប្រកបដោយសុវតិ្ថភាពនិងនិរន្តរភាព។

ជាមួយគ្នានេះ ត្រូវបន្តលើកកម្ពស់ការផ្តល់សេវាថែទាំសុខភាពជាប្រចាំ ​ជាពិសេស សេវា​សុខភាព​ជាសារវ័ន្តជូនប្រជាពលរដ្ឋ​គ្រប់រូប ​ប្រកប​ដោយ​គុណភាព ​សុវតិ្ថភាព​ និងប្រសិទ្ធភាពខ្ពស់។

ឯកឧត្តមសាស្រ្តាចារ្យ ម៉ម ប៊ុនហេង ​បានបញ្ជាក់ទៀតថា ​ផែនការយុទ្ធសាស្រ្តសុខាភិបាល ឆ្នាំ២០២២-២០៣០ ​និងយុទ្ធសាស្រ្តឌីជីថលសុខាភិបាល ​គឺ​ជាឧបករណ៍គោលនយោបាយផង និង​យុទ្ធសាស្រ្តផង ​ដែលបញ្ជាក់ពីការ ​ប្តេជ្ញាចិត្តរបស់ក្រសួងសុខាភិបាល ក្នុងការបន្តជំរុញវឌ្ឍនភាព​ក្នុងការអនុវត្តរបៀបវារៈនៃការអភិវឌ្ឍសុខភាពកម្ពុជា ​នៅក្នុងបណ្តាឆ្នាំខាងមុខ។

រាជរដ្ឋាភិបាលកម្ពុជា ក្រោមការដឹកនាំដ៏ឈ្លាសវៃ និងប្រកបដោយគតិបណ្ឌិតរបស់សម្តេច​អគ្គ​មហា​សេនាបតីតេជោ​ ហ៊ុន សែន​ នាយករដ្ឋមន្រី្តនៃព្រះរាជាណា​ចក្រកម្ពុជាបានកំណត់យ៉ាង​ច្បាស់​នូវចក្ខុវិស័យ ​ក្នុងការប្រែក្លាយកម្ពុជា ​ពីប្រទេសចំណូលមធ្យមកម្រិតទាប ទៅជាប្រទេស​ចំណូល​មធ្យម​កម្រិតខ្ពស់នៅឆ្នាំ២០៣០​ និងប្រទេសចំណូល​ កម្រិតខ្ពស់នៅឆ្នាំ២០៥០៕ អត្ថបទ រដ្ឋា