ភ្នំពេញ៖ ការកែទម្រង់ប្រព័ន្ធថវិការដ្ឋបាលថ្នាក់ក្រោមជាតិកម្ពុជា ដែលបានអនុវត្តតាមដំណាក់កាល កំពុងធានាបាននូវការផ្សារភ្ជាប់ទំនាក់ទំនងថវិកាទៅនឹងគោលនយោបាយ និងបានបង្កើតជាមូលដ្ឋានកាន់តែរឹងមាំ សម្រាប់ឈានទៅអនុវត្តប្រព័ន្ធថវិកាផ្តោតលើគណនេយ្យភាពសមិទ្ធកម្ម នៃកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈដំណាក់កាលទី៤។
ឯកឧត្តម កែវ បេងវឌ្ឍន៍ ប្រតិភូរាជរដ្ឋាភិបាលទទួលបន្ទុកជាអគ្គនាយក នៃអគ្គនាយកដ្ឋានហិរញ្ញវត្ថុរដ្ឋបាលថ្នាក់ក្រោមជាតិក្រសួងសេដ្ឋកិច្ច និងហិរញ្ញវត្ថុ លើកឡើងក្នុងកិច្ចប្រជុំគោលការណ៍ណែនាំ ស្តីពីឧបករណ៍វាយតម្លៃការរៀបចំផែនការយុទ្ធសាស្ត្រថវិការាជធានី-ខេត្ត នៅថ្ងៃទី ២២ ខែ មេសា ឆ្នាំ២០២២ នេះថា យុទ្ធសាស្ត្រនៃការកែទម្រង់ប្រព័ន្ធថវិការដ្ឋបាលថ្នាក់ក្រោមជាតិឆ្នាំ២០១៩-២០២៥ បានដាក់ចេញនូវផែនទីចង្អុលផ្លូវសម្រាប់ធ្វើការកែទម្រង់ប្រព័ន្ធថវិការដ្ឋបាលថ្នាក់ក្រោមជាតិកម្ពុជា ជាដំណាក់កាលៗ ដោយធានាបាននូវការផ្សារភ្ជាប់ទំនាក់ទំនងថវិកា ទៅនឹងគោលនយោបាយ និងបានបង្កើតជាមូលដ្ឋានកាន់តែរឹងមាំ សម្រាប់ឈានទៅអនុវត្តប្រព័ន្ធថវិកាផ្តោតលើ គណនេយ្យភាពសមិទ្ធកម្មដែលជាទិសដៅ នៃកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈដំណាក់កាលទី៤។
ឯកឧត្តម បន្តថា ការពង្រឹង និងពង្រីក នៃការរៀបចំផែនការយុទ្ធសាស្ត្រថវិកា និងថវិកាកម្មវិធីដល់គ្រប់រដ្ឋបាលរាជធានី-ខេត្ត គឺជាសកម្មភាពមួយយ៉ាងសំខាន់ ដើម្បីធានាការផ្សារភ្ជាប់ថវិកាទៅនឹងគោលបំណងគោលនយោបាយរដ្ឋបាលថ្នាក់ក្រោមជាតិ និងអាទិភាពគោលនយោបាយជាតិ ជាពិសេសការធ្វើការតម្រឹមជាមួយផែនការរបស់មន្ទីរជំនាញរាជធានី-ខេត្ត និងការធ្វើសមាហរណកម្មនៃផែនការរដ្ឋបាលក្រុង ស្រុក និងឃុំ សង្កាត់ជាបណ្តើរៗ។
ដូច្នេះការរៀបចំផែនការយុទ្ធសាស្ត្រថវិកា បានឆ្លុះបញ្ចាំងពីផែនការយុទ្ធសាស្រ្តរយៈពេល៣ឆ្នាំរំកិល តាមអភិក្រមពីក្រោមឡើងលើ ដែលរៀបចំជារៀងរាល់ឆ្នាំ ដោយផ្សារភ្ជាប់អាទិភាពគោលនយោបាយរបស់រដ្ឋបាលថ្នាក់ក្រោមជាតិ ទៅនឹងគោលដៅតាមវិស័យ និងផែនការអភិវឌ្ឍន៍ (ផែនការអភិវឌ្ឍន៍រយៈពេល៥ឆ្នាំ និងកម្មវិធីវិនិយោគ៣ឆ្នាំរំកិល)។
ឯកឧត្តម កែវ បេងវឌ្ឍន៍ បន្តថា ជុំវិញគោលការណ៍នេះ អគ្គនាយកដ្ឋានហិរញ្ញវត្ថុរដ្ឋបាលថ្នាក់ក្រោមជាតិ បានរៀបចំ និងកែលម្អ “គោលការណ៍ណែនាំ ស្តីពីការរៀបចំផែនការយុទ្ធសាស្ត្រថវិការាជធានី-ខេត្ត” ដោយបានកំណត់យ៉ាងច្បាស់ នូវជំហាននៃការរៀបចំផែនការយុទ្ធសាស្ត្រក្នុងនោះរួមមាន៖ ការរៀបចំរចនាសម្ព័ន្ធកម្មវិធី, ការកំណត់គោលបំណងគោលនយោបាយ និងវិធីសាស្ត្រនៃការកំណត់សូចនាករជាដើម ដើម្បីវាស់វែង និងវាយតម្លៃពីគុណភាព នៃការរៀបចំផែនការយុទ្ធសាស្ត្រថវិការបស់រដ្ឋបាលរាជធានី-ខេត្ត ។
សូមបញ្ជាក់ថា៖ គោលការណ៍ណែនាំ ស្តីពីឧបករណ៍វាយតម្លៃការរៀបចំផែនការយុទ្ធសាស្ត្រថវិការាជធានី-ខេត្ត ត្រូវបានរៀបចំ និងពិភាក្សាកម្រិតបច្ចេកទេស កាលពីខែធ្នូ ឆ្នាំ២០២១ កន្លងមក ដោយសម្រេចបានលទ្ធផល លើសេចក្តីព្រាងឯកសារឧបករណ៍វាយតម្លៃការរៀបចំផែនការយុទ្ធសាស្ត្រថវិការាជធានី-ខេត្ត នេះឡើងដោយឯកសារនេះផ្តោតសំខាន់លើចំណុចមួយចំនួនរួមមាន៖ ការកំណត់គោលបំណងគោលនយោបាយ, ការរៀបចំកម្មវិធី និងអនុកម្មវិធី, ការកំណត់សូចនាករ និងគោលដៅសូចនាករ, គ្រោងចំណូល និងតម្រូវការចំណាយ និងដំណើរការរៀបចំផែនការយុទ្ធសាស្ត្រថវិការាជធានី ខេត្ត៕ អត្ថបទ៖ សុន រ៉ាឌី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
