​

រុស្ស៊ី បានចោទអ៊ុយក្រែន កាលពីថ្ងៃសុក្រ ទី៥ ខែមិថុនា ពីការសម្លាប់ក្រុមនាវិកអាស៊ែបៃហ្សង់ នៅលើនាវាដឹកទំនិញពីរគ្រឿងដែលធ្វើដំណើរឆ្ពោះទៅកាន់កំពង់ផែរុស្ស៊ី ក្នុងការវាយប្រហារដោយយានដ្រូនដែលទីក្រុង Baku បាននិយាយថា បានសម្លាប់ពលរដ្ឋរបស់ខ្លួនយ៉ាងហោចណាស់ប្រាំនាក់។

អ៊ុយក្រែន បាននិយាយកាលពីថ្ងៃសុក្រថា យានដ្រូនរបស់ខ្លួនបានវាយប្រហារនាវាចំនួន៥គ្រឿងនៅកំពង់ផែ Mariupol និង Berdyansk នៅលើសមុទ្រ Azov ព្រមទាំងនៅក្នុងដែនទឹកឆ្នេរសមុទ្រនៃដែនដីគ្រប់គ្រងដោយរុស្ស៊ី។ លោក Robert Brovdi មេបញ្ជាការកងកម្លាំងយានដ្រូនអ៊ុយក្រែន បាននិយាយនៅក្នុងសេចក្តីថ្លែងការណ៍ថា យានដ្រូនរបស់លោកបានវាយប្រហារនាវាដឹកទំនិញស្ងួត និងនាវាដឹកប្រេងមួយគ្រឿងដែលពាក់ព័ន្ធនឹងការលួចគ្រាប់ធញ្ញជាតិអ៊ុយក្រែន ផ្ទេរទំនិញយោធា និងប្រេងឥន្ធនៈ ដោយឈ្មោះនាវាត្រូវបានលាបពណ៌លុបលើ ហើយរ៉ាដារបស់វាត្រូវបានបិទ។

ក្រសួងការបរទេសរុស្ស៊ីបាននិយាយថា នាវាពីរគ្រឿងគឺ នាវា Natra និង Zircon បានធ្វើដំណើរពីប្រទេសទួរគីទៅកាន់ Rostov-on-Don នៅភាគខាងត្បូងប្រទេសរុស្ស៊ី នៅពេលនោះនាវាត្រូវបានវាយប្រហារដោយយានដ្រូនរបស់អ៊ុយក្រែន។

ក្រសួងការបរទេសអាស៊ែបៃហ្សង់ បាននិយាយថា ក្រុមនាវិកនៅលើនាវាទាំងនោះរួមមានពលរដ្ឋអាស៊ែបៃហ្សង់សរុបចំនួន២៥នាក់។ ក្រសួងការបរទេសរុស្ស៊ីបាននិយាយថា នាវាពុំមែនជាកម្មសិទ្ធរបស់ប្រទេសអាស៊ែបៃហ្សង់ទេ។