កណ្ដាល ៖ នៅរសៀលថ្ងៃ ទី២២ ខែមេសា ឆ្នាំ២០២២ នេះកាកបាទក្រហមកម្ពុជា ដែលមានសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន បានចាត់ឱ្យឯកឧត្តមវេជ្ជ. អ៊ុយ សំអាត នាយក នាយកដ្ឋានគ្រប់គ្រងគ្រោះមហន្តរាយ កាកបាទក្រហមកម្ពុជា និងសហការី អញ្ជើញចូលរួមរំលែកទុក្ខយ៉ាងក្រៀមក្រំបំផុត ជាមួយក្រុមគ្រួសារមន្ត្រីនគរបាលចំនួន២រូប ដែលបានទទួលមរណភាព ក្នុងពេលបំពេញបេសកកម្មបង្ក្រាបបទល្មើសគ្រឿងញៀន។ 

ទី១-លោកវរសេនីយ៍ត្រី ជុច សុភា អាយុ៥០ឆ្នាំ នាយប៉ុស្តិ៍នគរបាលរដ្ឋបាលទួលព្រិច នៃអធិការដ្ឋាននគរបាលស្រុកអង្គស្នួល ស្នងការនគរបាលខេត្តកណ្តាល (ស្លាប់) ទី២-លោកអនុសេនីយ៍ទោ រឹម សុផាន់ណា អាយុ២៣ឆ្នាំ មន្ត្រីនគរបាលនៃអធិការដ្ឋាននគរបាលស្រុកអង្គស្នួល ស្នងការនគរបាលខេត្តកណ្តាល (ស្លាប់) និងទី៣- លោកអនុសេនីយ៍ត្រី នៃ វុទ្ធី មន្ត្រីនគរបាលប៉ុស្តិ៍ នគរបាលរដ្ឋបាលទួលព្រិច នៃអធិការដ្ឋាននគរបាលស្រុកអង្គស្នួល ស្នងការនគរបាលខេត្តកណ្តាល (របួសម្រាមដៃស្តាំ)។ ដោយគ្រួសារសពនីមួយៗទទួលបានថវិកាចំនួន១០លានរៀល ដោយឡែកមន្រ្តីដែលរងរបួសទទួលថវិកាចំនួន២លានរៀល។

ស្ថិតក្នុងសមានទុក្ខដ៏សោកសង្រេងនេះ ឯកឧត្តមវេជ្ជ. អ៊ុយ សំអាត បានពាំនាំនូវការចូលរួមរំលែកទុក្ខពីសំណាក់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជូនដល់ក្រុមគ្រួសារសព និងសូមសម្តែងនូវការសោកស្តាយជាទីបំផុត ចំពោះមរណភាពរបស់លោកវរសេនីយ៍ត្រី ជុច សុភា និងលោកអនុសេនីយ៍ទោ រឹម សុផាន់ណា គឺជាការបាត់បង់នូវ ឧត្តមស្វាមី ឪពុក និងញាតិមិត្តម្នាក់ប្រកបដោយព្រហ្មវិហារធម៌ មានទឹកចិត្តសន្តោសប្រណីដ៏ថ្លៃថ្លា ដែល លោកវរសេនីយ៍ត្រី បានប្រឹងប្រែងយកអស់កម្លាំងកាយចិត្ត សេចក្តីសុខផ្ទាល់ខ្លួន តស៊ូយ៉ាងស្វិតស្វាញ ក្នុងបេសកកម្ម    បង្ក្រាបបទល្មើសគ្រឿងញៀន រហូតលះបង់អាយុជីវិត ប្រកបដោយកិត្តិយស ដើម្បីបុព្វហេតុសន្តិសុខ សណ្តាប់ធ្នាប់សាធារណៈ និងសុខសុវត្ថិភាពសង្គម។

ក្នុងមរណទុក្ខក៏ក្រៀមគ្រំនេះ កាកបាទក្រហមកម្ពុជា សូមឧទ្ទិសបួងសួង ឱ្យដួងវិញ្ញាណក្ខន្ធសពទាំងពីរខាងលើ បានទៅកាន់សុគតិភព កុំបីឃ្លៀងឃ្លាតឡើយ៕អត្ថបទ ៖ សំ ងីម