បាត់ដំបង៖ វិទ្យាស្ថានជាតិវិជ្ជាជីវៈបាត់ដំបង បានរៀបចំកម្មវិធីធ្វើតេស្តទទួលស្គាល់ជំនាញពីមុន (RPL) ជូនដល់អតីតពលករខ្មែរដែលត្រឡប់មកពីប្រទេសថៃ ដើម្បីបំប្លែងបទពិសោធន៍ការងារ និងជំនាញជាក់ស្ដែងរបស់ពលករទៅជាវិញ្ញាបនបត្រទទួលស្គាល់ជំនាញផ្លូវការដើម្បីជួយពួកគាត់ទទួលបានឱកាសការងារល្អ និងប្រាក់ចំណូលប្រសើរឡើង។

លោក ហេង ងួនហ៊ត នាយកវិទ្យាស្ថានជាតិវិជ្ជាជីវៈបាត់ដំបង ថ្លែងឱ្យដឹងថា ការធ្វើតេស្តទទួលស្គាល់ជំនាញពីមុន(RPL)ជូនដល់អតីតពលករខ្មែរដែលត្រឡប់មកពីប្រទេសថៃដែលធ្វើឡើងនៅមជ្ឈមណ្ឌលវាយតម្លៃសមត្ថភាពរបស់វិទ្យាស្ថានជាតិវិជ្ជាជីវៈបាត់ដំបងនាថ្ងៃទី៦ ខែមិថុនា ឆ្នាំ២០២៦

មានអតីតពលករចំនួន៤៨នាក់ចូលរួមធ្វើតេស្តលើជំនាញចំនួន៨ក្នុងវិស័យសំណង់ ហើយការចំណាយលើការធ្វើតេស្តត្រូវបានរាជរដ្ឋាភិបាលគាំទ្រតាមរយៈក្រសួងការងារ និងបណ្តុះបណ្តាលវិជ្ជាជីវៈ។

លោក ហេង ងួនហ៊ត អំពាវនាវដល់អតីតពលករដែលមានជំនាញលើវិស័យសំណង់ សូមអញ្ជើញមកដាក់ពាក្យធ្វើតេស្តនៅវិទ្យាស្ថានជាតិវិជ្ជាជីវៈបាត់ដំបងដោយពុំមានបង់ប្រាក់ ដើម្បីទទួលបានវិញ្ញាបនបត្រផ្លូវការបញ្ជាក់អំពីជំនាញដែលមានពីមុន សំដៅបង្កើនឱកាសការងារ និងប្រាក់ចំណូលកាន់តែប្រសើរឡើង។

ជាមួយគ្នានោះ អតីតពលករ បានបង្ហាញអារម្មណ៍សប្បាយរីករាយ និងថ្លែងអំណរគុណដល់រាជរដ្ឋាភិបាលតាមរយៈក្រសួងការងារ និងបណ្ដុះបណ្ដាលវិជ្ជាជីវៈដែលផ្ដល់ឱកាសឱ្យពួកគាត់បានធ្វើតេស្តជំនាញដែលមានពីមុន ដើម្បីទទួលបានវិញ្ញាបនបត្រផ្លូវការ ងាយស្រួលក្នុងការស្វែងរកការងារធ្វើជាមួយប្រាក់ចំណូលកាន់តែប្រសើរឡើង។

អតីតពលករ អះអាងថា ពួកគាត់នឹងស្វែងរកឱកាសការងារក្នុងស្រុក និងឈប់វិលត្រឡប់ទៅធ្វើការនៅប្រទេសថៃទៀតហើយ។

សូមជម្រាបថា ដើម្បីជួយសម្រួលដល់បេក្ខជនធ្វើតេស្ត វិទ្យាស្ថានជាតិវិជ្ជាជីវៈបាត់ដំបងបានរៀបចំបរិយាកាសប្រឡងប្រកបដោយភាពងាយស្រួល និងផ្តល់ការគាំទ្រជាច្រើន ដូចជាផ្តល់ថវិកាឧបត្ថម្ភថ្លៃធ្វើដំណើរសម្រាប់បេក្ខជនដែលរស់នៅឆ្ងាយ ផ្គត់ផ្គង់អាហារ ទឹកបរិសុទ្ធ និងមានក្រុមការងារជួយសម្របសម្រួលតាំងពីការផ្សព្វផ្សាយព័ត៌មាន ការចុះឈ្មោះ រហូតដល់ដំណើរការធ្វើតេស្ត និងចេញវិញ្ញាបនបត្រជូន។អតីតពលករខ្មែរ ដែលត្រឡប់មកពីប្រទេសថៃមានអាយុចាប់ពី ១៦ឆ្នាំឡើងទៅ និងមានបទពិសោធការងារជាក់ស្តែង អាចដាក់ពាក្យចូលរួមធ្វើតេស្តដោយមិនបង់ប្រាក់ ហើយការធ្វើតេស្តនេះគ្របដណ្ដប់លើជំនាញចំនួន៨ក្នុងវិស័យសំណង់ រួមមាន៖ ១.ការងារកំបោរ, ២. ការងារការ៉ូ, ៣. ការដំឡើងពុម្ព, ៤. ការដំឡើងបណ្តាញបំពង់ទឹក, ៥.ការដំឡើងបណ្តាញអគ្គិសនីក្នុងអគារ, ៦. ការងាររន្ទា, ៧. ការដំឡើងសរសៃដែក និង៨.ការផ្សារអគ្គិសនី៕