ក្រោមស្មារតីយកចិត្តទុកដាក់ខ្ពស់លើការលើកកម្ពស់ជីវភាពរស់នៅ និង​សម្រួល​ដល់​ការ​​ធ្វើ​ដំណើរ​របស់​​ប្រជាព​លរដ្ឋនៅតាមមូលដ្ឋាននាព្រឹកថ្ងៃចន្ទ ទី៨ ខែមិថុនា ឆ្នាំ២០២៦ លោកអ្នកឧកញ៉ា បណ្ឌិត ទ្រី ភាព ប្រធានក្រុមការងារគណបក្សប្រជាជនកម្ពុជា ចុះជួយមូល​ដ្ឋាន​ស្រុក​ប្រាសា​ទ​បល្ល័ង្ក​ ខេត្តកំពង់ធំ បានអញ្ជើញជាអធិបតី​ក្នុងពិធីបើកការដ្ឋានសាងសង់ផ្លូវលំ ប្រវែង២៧ គីឡូ​ម៉ែត្រ ​ដែលស្ថិតក្នុងឃុំសាគ្រាម និងសំណេះសំណាលជាមួយសមាជិក សមាជិកាគណបក្ស នៅ​ស្រុក​ប្រាសាទបល្ល័ង្ក ខេត្តកំពង់ធំ។

សូមជម្រាបថា សមិទ្ធផលហេដ្ឋារចនាសម្ព័ន្ធ ផ្លូវថ្មីនេះ គឺជាអំណោយដ៏ថ្លៃថ្លារបស់ សម្តេច​មហា​បវរ​ធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត តាមរយៈលោកអ្នកឧកញ៉ាបណ្ឌិត ទ្រី ភាព និងលោកជំទាវ អ្នកឧកញ៉ា គៀន ស្រីនាង ដើម្បីជួយដោះស្រាយរាល់ទុក្ខលំបាករបស់ប្រជាពលរដ្ឋ ក៏ដូចជាសិស្សានុសិស្ស ដែល​កន្លងមកតែងតែជួបប្រទះការលំបាកក្នុងការធ្វើដំណើរលើដងផ្លូវដែលរងការខូចខាត ជា​ពិសេស​ពួកគាត់ជួបការលំបាកក្នុងការរស់នៅ ដូចជា មានដីហុយខ្លាំង រអិល និងមាន​ជង្ហុក​ជា​ដើម ​ជាពិសេសនៅក្នុងរដូវវស្សា។

នៅក្នុងឱកាសនោះ លោកអ្នកឧកញ៉ា បណ្ឌិត ទ្រី ភាព បានគូសបញ្ជាក់ថា ផ្លូវលំប្រវែង២៧ គីឡូ​ម៉ែត្រ ​ដែលចាប់ផ្តើមពីភូមិគេន្ទាក តភ្ជាប់ទៅកាន់ភូមិត្រពាំងព្រីង ក្នុងឃុំសាគ្រាមនេះ នឹងក្លាយ​ជា​សរសៃ​ឈាមសេដ្ឋកិច្ចដ៏សំខាន់ ក្នុងការជួយសម្រួលដល់ការធ្វើដំណើររបស់បងប្អូនប្រជាពលរដ្ឋ ធានា​សុវត្ថិភាពចរាចរណ៍ និងបង្កលក្ខណៈងាយស្រួលដល់ការដឹកជញ្ជូនកសិផល កសិ​ឧស្សាហ​កម្ម និងស្បៀងអាហារនានារបស់បងប្អូនប្រជាពលរដ្ឋ ទៅកាន់ទីផ្សារ ដែល​ជួយ​លើក​កម្ពស់​សេដ្ឋកិច្ច​គ្រួសារ និងជីវភាពរស់នៅរបស់ប្រជាពលរដ្ឋក្នុងមូលដ្ឋាន ឱ្យកាន់តែប្រសើរ​ឡើង​មួយ​កម្រិត​ថែម​ទៀត។​

គួរបញ្ជាក់ថា គម្រោងសាងសង់ផ្លូវមួយខ្សែនេះ គឺជាសមិទ្ធផលធំទី៣ហើយ ដែល​លោក​អ្នក​ឧកញ៉ា​បណ្ឌិត ទ្រី ភាព បានផ្តល់ជូនបងប្អូនប្រជាពលរដ្ឋនៅក្នុងស្រុកប្រាសាទបល្ល័ង្ក ខេត្ត​កំពង់ធំ​នេះ ក្នុងនោះគម្រោងទី១ គឺការឈូសឆាយ និងក្រាលគ្រួសក្រហមលើផ្លូវលំចំនួន ១០៦​ខ្សែ សរុបប្រវែង២១៥ គីឡូម៉ែត្រ នៅក្នុងឃុំសាលាវិស័យ និងគម្រោងទី២ ការសាង​សង់​ផ្លូវ​លំ​ក្រាល​គ្រួស​ក្រហម ប្រវែង ៥.៧ គីឡូម៉ែត្រ នៅក្នុងឃុំក្រយា។

ក្នុងឱកាសដ៏វិសេសវិសាលនោះដែរ លោកអ្នកឧកញ៉ា បណ្ឌិត ក៏បាន​នាំ​យក​នូវ​អំណោយ​ដ៏​ថ្លៃ​ថ្លា​មួយ​ចំនួន​ មកចែកជូនដល់ថ្នាក់ដឹកនាំគណបក្ស ស្រុក ឃុំ កងកម្លាំងប្រដាប់អាវុធ ក្រុមគ្រូពេទ្យ និង​បងប្អូនប្រជាពលរដ្ឋដែលបានចូលរួម សរុបប្រមាណ ៤១៤៩ នាក់ ។

ក្រៅពីការផ្ដល់ជូននូវអំណោយទាំងនេះហើយ ឯកឧត្តម លោកអ្នកឧកញ៉ា ក៏បាន​ធ្វើ​ការ​ចង​ដៃ​ដល់​គូរ​ស្វាមីភរិយាថ្មីចំនួន ៨៤គូរ និងស្ត្រីមានផ្ទៃពោះចំនួន ១០៤នាក់ ដែលក្នុង​ម្នាក់​ៗ​ទទួល​បាន​ថវិកា​ចំនួន ១សែនរៀលផងដែរ។

សូមបញ្ជាក់ថវិកាសរុបដែលបានចំណាយក្នុងកម្មវិធីសំណេះសំណាល ការរៀបចំពិធីនាថ្ងៃនេះ ស​រុប​អស់ថវិកា ប្រមាណ ២៥៥ លានរៀល៕ អត្ថបទ៖ សំ សីហា​