មន្ត្រីទីភ្នាក់ងារគ្រោះមហន្តរាយ បាន​បញ្ជាក់​ឲ្យ​ដឹង​ថា ចំនួនអ្នកស្លាប់ដោយសាររញ្ជួយដីកម្រិត ៧,៨រ៉ិចទ័រនៅភាគខាងត្បូងនស​ប្រទេសហ្វីលីពីន បានកើនឡើងដល់យ៉ាងហោចណាស់ ១៥នាក់ហើយ​ ដោយមានអ្នក​របួស​ជាង ១០០នាក់។

រញ្ជួយដីនេះបានកើត​ឡើង​នៅភាគខាងត្បូងកោះ Mindanao នៅ​ថ្ងៃចន្ទ (ទី៨ ខែមិថុនា ឆ្នាំ២០២៦) នេះ ដោយបានបណ្ដាល​ឲ្យ​អគារបាក់​រលំ និងបង្កឲ្យ​មានការព្រមានអំពីរលកយក្សស៊ូណាមិ នៅទូទាំងតំបន់។ ហើយ​អាជ្ញាធរហ្វីលីពីន បានជំរុញឲ្យ​ប្រជាជននៅតំបន់ឆ្នេរសមុទ្រដែលរងផលប៉ះពាល់ផ្លាស់ទៅទី​ខ្ពស់បន្ទាប់ពីរញ្ជួយដី​នៅឆ្នេរសមុទ្រ បានវាយប្រហារភាគខាងត្បូងនៃទីក្រុង General Santos ជាទីក្រុងមួយដែលមានប្រជាជនប្រហែល ៧២០.០០០នាក់។

​បើយោងតាម​ទី​ភ្នាក់​ងារ​ស្ទាប​ស្ទង់ភូគព្ភសាស្ត្ររបស់​សហរដ្ឋអាមេរិក បាន​ឲ្យ​ដឹង​ថា រញ្ជួយតូច​ៗដ៏ខ្លាំងក្លា​​ជាបន្តបន្ទាប់ បានធ្វើ​ឲ្យ​តំបន់នេះ​រង្គើ​រយៈ​ពេល​ប្រហែល ២ម៉ោងបន្ទាប់ពីមាន​រញ្ជួយដីលើកដំបូង ដោយ​ខ្លាំង​បំផុតមានកម្រិត​ ៦,៥រ៉ិចទ័រ។ វីដេអូដែលត្រូវបានបង្ហោះនៅ​លើ​បណ្ដាញ​សង្គម និងត្រូវបានផ្ទៀងផ្ទាត់ដោយសារព័ត៌មាន​ AFP បានបង្ហាញឲ្យឃើញ​មជ្ឈមណ្ឌលផ្សារទំនើបមួយដែលមានភោជនីយដ្ឋានអាហាររហ័ស Jollibee បានបាក់​រលំទៅជាគំនរបាក់បែកនៅក្នុងទីក្រុង General Santos។ ប្រធានាធិបតីហ្វីលីពីន លោក Ferdinand Marcos បានផ្អាកថ្នាក់រៀននៅតំបន់ដែលរងផលប៉ះពាល់នៃកោះ Mindanao ខណៈពេលដែលអំពាវនាវឲ្យ​ប្រជាជននៅតំបន់ឆ្នេរសមុទ្រជម្លៀសចេញជាបន្ទាន់។

រញ្ជួយដីនៅថ្ងៃចន្ទនេះ​ បានបង្កឲ្យ​មានការព្រមាន អំពី​ការជម្លៀស សម្រាប់តំបន់ឆ្នេរសមុទ្រនៃប្រទេសជិតខាង គឺឥណ្ឌូនេស៊ី និងម៉ាឡេស៊ី តែ​ប្រទេសទាំង២ បានដក​ការព្រមានជាបន្តបន្ទាប់។ ចំណែក​អាជ្ញាធរ​របស់ប្រទេស​​ជប៉ុនបានចេញសេចក្តីជូនដំណឹង អំពីរលកយក្សស៊ូណាមិសម្រាប់តំបន់ឆ្នេរសមុទ្រប៉ាស៊ីហ្វិករបស់ខ្លួន ដោយព្យាករ​ថា រលកយក្សស៊ូណាមិ អាច​នឹងវាយប្រហារតំបន់ផ្សេងៗគ្នា៕