ប្រធានាធិបតីចិន លោក ស៊ី ជីនពីង (Xi Jinping) នៅ​ថ្ងៃចន្ទ (ទី៨ ខែមិថុនា ឆ្នាំ២០២៦) នេះ បានសន្យាថា នឹងពង្រីកទំនាក់ទំនងរបស់ប្រទេស​ចិនជាមួយកូរ៉េខាងជើង និងបានអំពាវនាវឲ្យ​មានសន្តិភាពក្នុងតំបន់ ក្នុងអំឡុងពេលមាន​កិច្ច​ពិភាក្សា​ជាមួយមេដឹកនាំកូរ៉េខាងជើង លោក គីម ជុងអ៊ុន (Kim Jong Un) នៅ​ក្នុង​ដំណើរទស្សនកិច្ចលើកដំបូងរបស់លោកទៅកាន់ទីក្រុងព្យុងយ៉ាង ក្នុងរយៈពេល ៧ឆ្នាំ។

លោក ស៊ី បានបញ្ជាក់​ថា ចិន «ត្រៀមខ្លួនរួចជាស្រេច ដើម្បីពង្រីក» កិច្ចសហប្រតិបត្តិការជាក់ស្តែងជាមួយកូរ៉េខាងជើង នៅ​ក្នុងវិស័យនានា ដែល​មាន​សេដ្ឋកិច្ច និងពាណិជ្ជកម្ម កសិកម្ម សំណង់ វិទ្យាសាស្ត្រ និងបច្ចេកវិទ្យា ក៏ដូចជាការថែទាំសុខភាព។ នេះបើយោងតាមទីភ្នាក់ងារសារព័ត៌មានរដ្ឋ Xinhua។

ជាមួយគ្នានេះ លោកក៏បានជំរុញផង​ដែរ​ឲ្យ​ភាគីទាំង២ «ការពារយ៉ាងម៉ឺង​ម៉ាត់​» ចំពោះ​អធិបតេយ្យភាព សន្តិសុខ និងផលប្រយោជន៍អភិវឌ្ឍន៍របស់ប្រទេស​ទាំង២។ លោក ស៊ី បានបន្ត​ទៀត​ថា ប្រទេសចិន និងកូរ៉េខាងជើង «គួរតែរួមគ្នារក្សាសន្តិភាព និងការអភិវឌ្ឍក្នុងតំបន់»។

លោក ស៊ី បានអំពាវនាវឲ្យ​ប្រទេសទាំង២ ផ្តល់អត្ថប្រយោជន៍កាន់តែធំធេង​ដល់ប្រជាជនរបស់ភាគី​ទាំង​២ ពង្រឹងកិច្ចសហប្រតិបត្តិការជាក់ស្តែង រក្សាការផ្លាស់ប្តូរកម្រិតខ្ពស់ និងពង្រឹងទំនុកចិត្តគ្នាទៅវិញទៅមកខាងនយោបាយ។ លោក​ប្រធានាធិបតីចិនបានបន្ថែម​ថា លោកត្រៀមខ្លួនរួចជាស្រេច ដើម្បីធ្វើការជាមួយលោក គីម ដើម្បីជំរុញទំនាក់ទំនងទ្វេភាគី និងពង្រឹងភាព​ស្រប​គ្នានៃ​យុទ្ធសាស្ត្រអភិវឌ្ឍន៍របស់ប្រទេសទាំង២​។

កិច្ចពិភាក្សារបស់លោក ស៊ី ជាមួយលោក គីម ក្នុងអំឡុងពេលដំណើរទស្សនកិច្ចដ៏កម្រនេះ ធ្វើឡើងនៅពេលដែលភាគីទាំង២ ប្រារព្ធខួបលើកទី៦៥ នៃសន្ធិសញ្ញាមិត្តភាព កិច្ចសហប្រតិបត្តិការ និងជំនួយទៅវិញទៅមករបស់ប្រទេស​ទាំង២។

ហើយ​ដំណើរទស្សនកិច្ចរបស់លោក ស៊ី នេះ​ ក៏​ធ្វើឡើងផង​ដែរ នៅពេលដែលមានការផ្លាស់ប្តូរសន្ទុះ​ក្នុងតំបន់ ក្នុង​នោះ​រួមទាំងការពង្រឹងទំនាក់ទំនង រវាងទីក្រុងព្យុងយ៉ាង និងមូស្គូ ក្រោមសន្ធិសញ្ញាភាពជាដៃគូយុទ្ធសាស្ត្រគ្រប់ជ្រុង​ជ្រោយ​ដែលត្រូវ​បានចុះហត្ថលេខានៅឆ្នាំ២០២៤ ដែលរួមបញ្ចូលទាំងការប្តេជ្ញាចិត្តការពារជាតិទៅវិញទៅមកផង​ដែរ៕