ប្រព័ន្ធផ្សព្វផ្សាយអ៊ីស្រាអែល បានឲ្យ​ដឹង​នៅ​ថ្ងៃចន្ទ (ទី៨ ខែមិថុនា ឆ្នាំ២០២៦) នេះ​ថា កងទ័ពអ៊ីស្រាអែលរំពឹងថា ការប្រឈមមុខដាក់គ្នាផ្នែក​យោធា ជាមួយអ៊ីរ៉ង់ នឹងបន្តរយៈពេល «ជាច្រើនថ្ងៃ» ​ ក្នុង​អំឡុង​ពេលមានការការវាយប្រហារគ្នា​ទៅវិញ​ទៅមក រវាងប្រទេសទាំង២។

វិទ្យុកងទ័ពបានផ្សាយ​ថា៖ «ការវាយតម្លៃពីកងទ័ពអ៊ីស្រាអែល គឺថា ការប្រឈមមុខដាក់គ្នាជាមួយអ៊ីរ៉ង់ នឹងបន្តរយៈពេលជាច្រើនថ្ងៃ»។ ប្រព័ន្ធ​ផ្សព្វផ្សាយ​នេះបានឲ្យ​ដឹង​ទៀត​ថា កងទ័ពបានចាប់ផ្តើមរៀបចំត្រៀម​ សម្រាប់ការកោះហៅកងកម្លាំងបម្រុងយ៉ាងច្រើន​ តែ​មិនបានផ្តល់ព័ត៌មានលម្អិតបន្ថែមឡើយ​។

ទន្ទឹមនឹងនេះដែរ បញ្ជាការដ្ឋានរណសិរ្សមាតុភូមិអ៊ីស្រាអែល បានរឹតបន្តឹងការជួបជុំ និងការ​ធ្វើ​ដំណើរ​ទូទាំងប្រទេសយ៉ាង​តឹង​រ៉ឹង​ រហូតដល់ល្ងាចថ្ងៃចន្ទ។

ចំណែក​ប្រព័ន្ធផ្សព្វផ្សាយសាធារណៈ KAN បានឲ្យ​ដឹង​ថា ការណែនាំថ្មីអនុញ្ញាតឲ្យ​មានការជួបជុំមនុស្សរហូតដល់ ២០០នាក់ នៅក្នុងតំបន់ហាល​វាល​ និង ៥០០នាក់ នៅក្នុងអគារ ឬសាល​​ ដរាប​ណា​មនុស្សម្នា​អាចទៅដល់តំបន់ការពារ ក្នុង​រង្វង់​រយៈពេលដែលត្រូវការ។

ប្រព័ន្ធ​ផ្សព្វផ្សាយ​ដដែល​ បាន​ឲ្យ​ដឹងបន្ថែម​ថា ការរឹតបន្តឹងនេះក៏រួមបញ្ចូលទាំងការបិទឆ្នេរ​មិន​ឲ្យ​សាធារណជនធ្វើ​ដំណើរ​ទៅ​ផងដែរ ខណៈដែលកន្លែងធ្វើការអាចបន្តដំណើរការបាន ប្រសិនបើពួកគេអាចចូលទៅកាន់តំបន់ការពារ តាម​រយៈពេលដែលត្រូវការ​។

គួរបញ្ជាក់​ថា ភាពតានតឹងបានកើនឡើងកាល​ពី​ថ្ងៃអាទិត្យចុង​សប្ដាហ៍កន្លង​ទៅ​ នៅពេលដែលអ៊ីស្រាអែលបានទម្លាក់គ្រាប់បែកលើរដ្ឋធានីបេរូតរបស់ប្រទេសលីបង់ ទោះបីជាមានបទឈប់បាញ់ជាបន្តបន្ទាប់ក៏ដោយ ហើយ​អ៊ីរ៉ង់បាញ់មីស៊ីលទៅភាគខាងជើងអ៊ីស្រាអែល ដើម្បីសងសឹក ដោយអ៊ីស្រាអែលបានឆ្លើយតបដោយការវាយប្រហារតាមអាកាសជាច្រើនលើក លើ​អ៊ីរ៉ង់៕