ភ្នំពេញ៖ ក្រុម​គ្រូពេទ្យប្រចាំស្រុកប្រតិបតិ្តពោធិ៍សែនជ័យ នៃមនី្ទរសុខាភិបាលរាជធានីភ្នំពេញ សហការជាមួយអាជ្ញាធរមូលដ្ឋានខណ្ឌពោធិ៍សែនជ័យ នឹងបើកយុទ្ធការចុះ​ចាក់​វ៉ាក់​សាំង​បង្ការ​ជំងឺកូវីដ-១៩ ​ដូសមូលដ្ឋានដូសជំរុញ ​ជូនដល់សិស្សសាលាបឋម​សិក្សា​ទូទាំង​ខណ្ឌពោធិ៍សែនជ័យ។

បើតាមឯកឧត្តមវេជ្ជបណ្ឌិត ងី មានហេង ប្រធានមនី្ទរសុខាភិបាលរាជធានីភ្នំពេញ ប្រាប់BTV ព័ត៌មាន នាព្រឹកថ្ងៃទី២៣ ខែមេសា ឆ្នាំ២០២២នេះថា ក្រុមគ្រូពេទ្យប្រចាំ​ស្រុកប្រតិបតិ្តពោធិ៍សែនជ័យ ​សហការជាមួយការិយាល័យអប់រំយុវជន និងកីឡា នៃរដ្ឋបាលខណ្ឌពោធិ៍សែនជ័យ បានរៀបចំ​ផែន​ការ​បើកយុទ្ធនាការចុះចាក់វ៉ាក់សាំងបង្ការជំងឺកូវីដ-១៩ ដូសមូលដ្ឋាន​ និងដូសជំរុញ ជូនសិស្សា​នុ​សិស្ស សាលាបឋមសិក្សាសាធារណៈ អាយុចាប់ពី៦ឆ្នាំ រហូដល់១២ឆ្នាំ ដែល​មានចំនួន​សរុប​១៥សាលាបឋមសិក្សាក្នុងខណ្ឌ ដែលមានចំនួនសិស្សសរុប ២០ ៨៧៥នាក់។

យុទ្ធនាការចុះចាក់វ៉ាក់សាំងបង្ការជំងឺកូវីដ១៩ នៅតាមសាលាបឋមសិក្សា​សាធារណៈក្នុង​មូលដ្ឋានខណ្ឌពោធិ៍សែនជ័យ នឹងចាប់ផ្តើមពីថ្ងៃទី២៥ ខែមេសា ឆ្នាំ២០២២ រហូតដល់ថ្ងៃទី១៣ ខែឧសភា ឆ្នាំ២០២២។

ដូច្នេះសូមមាតា បិតា អាណាព្យាបាលរបស់កុមារ សិស្សានុសិស្សទាំងអស់ នាំយកបុត្រធីតា​របស់ខ្លួន មកទទួលការចាក់វ៉ាក់សាំងបង្ការជំងឺកូវីដ១៩ ​និងសូមភ្ជាប់មកជាមួយនូវ​ឯកសារដូចជា អត្តសញ្ញាណប័ណ្ណ​ សំបុត្រកំណើត​ ឬសំបុត្របញ្ជាក់កំណើត​ ឬលិខិតឆ្លងដែន ​ឬសៀវភៅស្នាក់នៅ ឬសៀវភៅគ្រួសារ​ និងលិខិតព្រមព្រៀង​អនុញ្ញាត​ឲ្យចាក់វ៉ាក់​សាំង​ជា​លាយលក្ខណ៍​អក្សរ​ពី​សំណាក់មាតា បិតា អាណាព្យាបាល​ សម្រាប់ការចាក់វ៉ាក់សាំងបង្ការជំងឺកូវីដ១៩​ ដូសមូលដ្ឋាន និងប័ណ្ណចាក់វ៉ាក់សាំងបង្ការជំងឺកូវីដ១៩៕ អត្ថបទ រដ្ឋា