យន្តហោះចម្បាំង Rafale របស់ប្រទេសបារាំង បានបាញ់ទម្លាក់យានដ្រូនមួយគ្រឿង ដែលបានចូលទៅក្នុងដែនអាកាសរបស់ប្រទេសឡាតវីពីប្រទេសរុស្ស៊ី ជាឧបទ្ទវហេតុសន្តិសុខចុងក្រោយតាមបណ្តោយព្រំដែនភាគខាងកើតរបស់សម្ព័ន្ធយោធាណាតូ។ យានដ្រូននេះ ត្រូវបានស្ទាក់ចាប់កាលពីថ្ងៃចន្ទនៅជិតភូមិ Berzgale ចម្ងាយប្រហែល១៨ម៉ាយពីព្រំដែនប្រទេសរុស្ស៊ី។

កងទ័ពប្រទេសឡាតវី បាននិយាយថា យានដ្រូនបានឆ្លងកាត់ចូលទៅក្នុងប្រទេសនេះ បណ្តាលមកពីសង្គ្រាមអេឡិចត្រូម៉ាញ៉េទិចរបស់រុស្ស៊ី ប៉ុន្តែមិនបាននិយាយថា នរណាជាអ្នកបាញ់បង្ហោះវានោះទេ។

រដ្ឋមន្ត្រីការពារជាតិឡាតវី បាននិយាយថា បញ្ជាការដ្ឋានណាតូ បានធ្វើការសម្រេចចិត្តចុងក្រោយដើម្បីបាញ់ទម្លាក់យានដ្រូន។ គ្មាននរណាម្នាក់រងរបួសនិងពុំមានការខូចខាតណាមួយត្រូវបានរាយការណ៍នោះទេ។ កងទ័ពបារាំង ក៏បានបញ្ជាក់ផងដែរថា យន្តហោះចម្បាំងរបស់ខ្លួនបានបាញ់ទម្លាក់យានដ្រូនដែលមិនស្គាល់អត្តសញ្ញាណមួយគ្រឿង។ នាយករដ្ឋមន្ត្រីប្រទេសឡាតវី បានសរសើរចំពោះការឆ្លើយតបយ៉ាងឆាប់រហ័ស ខណៈសម្ព័ន្ធយោធាណាតូនិយាយថា ឧបទ្ទវហេតុនេះបង្ហាញពីសមត្ថភាពរបស់សម្ព័ន្ធមិត្តក្នុងការរារាំង និងការពារ។

ឧបទ្ទវហេតុនេះ កើតឡើងក្នុងពេលមានការព្រួយបារម្ភកាន់តែខ្លាំងឡើងថា សង្គ្រាមរបស់រុស្ស៊ីជាមួយអ៊ុយក្រែន អាចហៀរចូលព្រំដែនរបស់សម្ព័ន្ធយោធាណាតូ។ កាលពីខែមុន យន្តហោះយោធារបស់ប្រទេសរ៉ូម៉ានីមួយគ្រឿងបានបាញ់ទម្លាក់យានដ្រូនរបស់អ៊ុយក្រែនដែលសង្ស័យនៅលើប្រទេសអេស្តូនី។