ប្រទេសចិន នៅ​ថ្ងៃអង្គារ (ទី៩ ខែមិថុនា ឆ្នាំ២០២៦) នេះ បានបញ្ជាក់​ថា ការប្រើប្រាស់កម្លាំងយោធាដោយសហរដ្ឋអាមេរិក អ៊ីស្រាអែល និងអ៊ីរ៉ង់ «បានបង្ហាញ» ថា មិនអាចមាន​ការ​ដោះស្រាយបញ្ហាណាមួយបានទេ ដោយសង្កត់ធ្ងន់លើដំណោះស្រាយការទូត ចំពោះជម្លោះ។

អ្នកនាំពាក្យក្រសួងការបរទេស លោក Lin Jian បានប្រាប់អ្នកសារ​ព័ត៌មាននៅទីក្រុងប៉េកាំងថា ជម្លោះ រវាងសហរដ្ឋអាមេរិក-អ៊ីស្រាអែល និង​អ៊ីរ៉ង់ «ដែលបានអូសបន្លាយអស់រយៈពេលជាង ៣ខែមកហើយនោះ​ បានបង្កផលប៉ះពាល់យ៉ាងធ្ងន់ធ្ងរដល់ប្រទេសនានា នៅក្នុងតំបន់ឈូងសមុទ្រពែក្ស«។

លោក Lin បាននិយាយថា៖ «ការពិតបានបង្ហាញថា មធ្យោបាយយោធា មិនអាចដោះស្រាយបញ្ហាណាមួយបានឡើយ​ ហើយការប្រើប្រាស់កម្លាំងដោយបំពាន នឹងត្រឹម​តែ​ធ្វើឲ្យ​បញ្ហាកាន់តែស្មុគស្មាញ​ប៉ុណ្ណោះ​»។ លោកកំពុងប្រតិកម្មចំពោះរបាយការណ៍ អំពីការរំលោភបំពានរបស់អ៊ីស្រាអែល លើបទឈប់បាញ់ នៅលីបង់ ទោះបីជាសហរដ្ឋអាមេរិកបានដាក់សម្ពាធលើទីក្រុង Tel Aviv កុំ​ឲ្យ​ធ្វើ​ការវាយប្រហារក៏ដោយ។

អម​ដោយការ​អំពាវនាវឲ្យ​មានការគោរពអធិបតេយ្យភាព សន្តិសុខ និងបូរណភាពទឹកដីរបស់ប្រជាជាតិតំបន់​មជ្ឈិមបូព៌ា លោក Lin បានសង្កត់ធ្ងន់​ថា៖ «ការចរចា រវាងអ៊ីរ៉ង់ និងសហរដ្ឋអាមេរិក កំពុងស្ថិតក្នុងដំណាក់កាលដ៏សំខាន់មួយ នា​ពេលនេះ។ គ្មានភាគីណាមួយ គួរបង្កជម្លោះយោធាឡើងវិញទេ»។ លោកបាន​បន្ថែម​ថា៖ «ប្រទេសចិនអំពាវនាវឲ្យ​ភាគីពាក់ព័ន្ធរក្សាភាពស្ងប់ស្ងាត់ អត់ធ្មត់ បញ្ឈប់សកម្មភាពប្រឈមមុខដាក់គ្នាណាមួយដែលអាចធ្វើឲ្យ​ជម្លោះកាន់តែធ្ងន់ធ្ងរឡើង ចាត់វិធានការជាក់ស្តែង ដើម្បីបន្ធូរបន្ថយស្ថានការណ៍ ដោះស្រាយជម្លោះតាមរយៈមធ្យោបាយនយោបាយ និងការទូត ហើយ​ធ្វើការដើម្បីឲ្យ​មាន​បទឈប់បាញ់គ្រប់ជ្រុង​ជ្រោយ​ និងយូរអង្វែង»។

គួរបញ្ជាក់​ថា ការអត្ថាធិប្បាយរបស់ទីក្រុងប៉េកាំងនេះ បានកើតឡើងក្នុង​អំឡុង​ពេលដែល​អាច​មាន​ភាពតានតឹង នៅក្នុងទំនាក់ទំនងរវាងសហរដ្ឋអាមេរិក និងអ៊ីស្រាអែល បន្ទាប់ពីប្រធានាធិបតីសហរដ្ឋអាមេរិក លោក Donald Trump បានអំពាវនាវឲ្យ​អ៊ីស្រាអែលកុំសងសឹក ចំពោះការវាយប្រហារដោយមីស៊ីលរបស់អ៊ីរ៉ង់ កាលពីថ្ងៃអាទិត្យចុង​សប្ដាហ៍​កន្លង​មក​ ជាការទាមទារដែលមិន​ត្រូវបានអើពើ៕