ក្រុមមន្រ្តីក្នុងស្រុកនិយាយនៅថ្ងៃអង្គារនេះថា មនុស្សយ៉ាងហោច ៣នាក់ ត្រូវបានសម្លាប់ និងមនុស្សជាច្រើនទៀត បានរងរបួស ក្រោយអគ្គិភ័យឆាបឆេះឡើងនៅរោងចក្រផលិតផាវខុសច្បាប់មួយកន្លែង ស្ថិតក្នុងទីក្រុងភាគពាយ័ព្យ Jaipur ប្រទេសឥណ្ឌា ។ ពួកគេបន្តថា មនុស្ស ៨នាក់ បាននៅក្នុងរោងចក្រ ពេលដែលអគ្គិភ័យកើតឡើង ។

លោក Yugantar Sharma គឺជាចៅក្រមក្រុង Jaipur និយាយថា ពួកយើងទទួលបានព័ត៌មានថា មាននូវអគ្គិភ័យនៅទីនេះ ហើយការងារសង្រ្គោះ បានចាប់ផ្តើម ។

លោកបន្តថា ក្នុងរយៈពេលប្រហែល ២០-២៥នាទី អគ្គិភ័យ ត្រូវបានទប់ស្កាត់ជាប់ ហើយដូចអ្នកឃើញស្រាប់ហើយថា អគាររងការខូចខាតទាំងស្រុង ។ មនុស្ស ៥នាក់ បានរងរបួស ហើយពួកគេទទួលបានការព្យាបាលនៅមន្ទីរពេទ្យ ខណៈមនុស្ស ៣នាក់ បានស្លាប់ ។

សូមបញ្ជាក់ថា ហេតុការណ៍ផ្ទុះ និងអគ្គិភ័យនៅតាមរោងចក្រផលិតកាំជ្រួចផ្កាភ្ញី និងរោងចក្រផលិតផាវ បានក្លាយជារឿងធម្មតាទៅហើយនៅក្នុងប្រទេសឥណ្ឌា ដោយសារមានវិធានការការពារតិចតួចប៉ុណ្ណោះ រារាំងកុំឲ្យឧបទ្ទេវហេតុបែបនេះ កើតឡើង ៕