សណ្ឋាគារ ភោជនីយដ្ឋាន សារមន្ទីរ និងដងផ្លូវដែលធ្លាប់មមាញឹកនៅក្នុងទីក្រុងឡាហាវ៉ាន់ របស់គុយបា បច្ចុប្បន្នគ្មានភ្ញៀវបរទេសនោះទេ ។

ដោយរងផលប៉ះពាល់ដោយសារកង្វះខាត ការដាច់ចរន្តអគ្គិសនី និងវិបត្តិសេដ្ឋកិច្ចដ៏ធ្ងន់ធ្ងរ ឧស្សាហកម្មគ្មានផ្សែងនៅក្នុងប្រទេសមួយនេះ ពុំដែលងើបរួចនោះទេ ចាប់តាំងពីការរីករាលដាលឆ្លងជំងឺ COVID-19រហូតមក ក្នុងនោះចំនួនភ្ញៀវទេសចរពុំដែលឈានដល់កម្រិតពាក់កណ្តាលនៃចំនួនភ្ញៀវទេសចរ ៤,៧៥នាក់ កាលពីឆ្នាំ ២០១៨ម្តងណាទេ ហើយស្ថានភាពកាន់តែអាក្រក់ខ្លាំងនៅក្នុងឆ្នាំនេះ ។

សហរដ្ឋអាមេរិក បាននិយាយបង្ហើបឲ្យដឹងពីលទ្ធភាពនៃសកម្មភាពយោធាប្រឆាំងនឹងគុយបា និងដាក់ទណ្ឌកម្មថ្មីលើរដ្ឋាភិបាលកុម្មុយនិស្តរបស់ប្រទេសកោះមួយនេះ ។

ស្របពេលដែលទីក្រុងវ៉ាស៊ីនតោន គំរាមពិន័យជនបរទេសដែលធ្វើធុរកិច្ចជាមួយបុគ្គលរងទណ្ឌកម្ម ភាគច្រើននៃក្រុមហ៊ុនធ្វើដំណើរ បានចាកចេញ ឬកាត់បន្ថយសកម្មភាពរបស់ពួកគេលើប្រទេសកោះមួយនេះ ។

លោក Adianet Labrada គឺជាអ្នកតំណាងទីភ្នាក់ងារទេសចរណ៍គុយបា និយាយថា វិស័យទេសចរណ៍នៅគុយបា តែងតែស្ថិតក្នុងចំណោមវិស័យដែលរួមចំណែកសំខាន់បំផុតចំពោះសេដ្ឋកិច្ច ហើយនិងស្ថិតក្នុងចំណោមវិស័យដែលរងផលប៉ះពាល់ខ្លាំងបំផុតដោយសារទណ្ឌកម្មរបស់រដ្ឋាភិបាលសហរដ្ឋអាមេរិក ។

ក្នុងរយៈពេលប៉ុន្មានសប្តាហ៍កន្លងមកនេះ ក្រុមហ៊ុនសណ្ឋាគារចំនួន ២ ដែលប្រតិបត្តិការនៅក្នុងប្រទេសគុយបា បានប្រកាសថា ពួកគេនឹងកាត់បន្ថយប្រតិបត្តិការរបស់ខ្លួន ខណៈក្រុមហ៊ុនសណ្ឋាគារបរទេសមួយទៀត ប្រកាសដកខ្លួនចេញទាំងស្រុង ។

ដោយឡែក ក្រុមហ៊ុនអាកាសចរណ៍អន្តរជាតិជាច្រើន បានផ្អាកការហោះហើររបស់ពួកគេផងដែរទៅកាន់ប្រទេសគុយបា ដោយលើកឡើងពីកង្វះខាតការផ្គត់ផ្គង់ប្រេងយន្តហោះ ៕