យោងតាមសារព័ត៌មាន​ ​​LRT បាន​ឲ្យ​ដឹង​ថា នាយករដ្ឋមន្ត្រីលីទុយអានី លោកស្រី Inga Ruginiene បាននិយាយថា ការលុក​លុយ​ដោយ​យាន​ដ្រូន​ថ្មីៗនេះ នៅ​រដ្ឋតំបន់​បាល់ទិក បង្ហាញពីតម្រូវការមាន​វត្តមានរបស់អង្គការណាតូ (NATO) ឲ្យ​កាន់តែ​ខ្លាំង​ក្លា នៅ​តាមបណ្តោយព្រំ​ដែន​ប៉ែក​ខាងកើតរបស់សម្ព័ន្ធមិត្ត។

បន្ទាប់ពីមាន​កិច្ចប្រជុំកំពូលនៃមេដឹកនាំអឺរ៉ុប​ខាង​ជើង​-បាល់​ទិក​ នៅទីក្រុង Tallinn ប្រទេស​អេស្តូនី កាលពីថ្ងៃអង្គារ (ទី៩ ខែមិថុនា ឆ្នាំ​២០២៦) លោកស្រី Ruginiene បាននិយាយថា៖ «ឧប្បត្តិហេតុយាន​ដ្រូន​ថ្មីៗនេះ បង្ហាញពីសារៈសំខាន់នៃ​ការ​មាន​វត្តមានកាន់តែ​រឹង​មាំ​របស់កង​កម្លាំង​អង្គការ​ណាតូ និងការទប់ស្កាត់ដ៏គួរឲ្យ​ទុកចិត្ត នៅទូទាំងតំបន់​ព្រំ​ដែន​ប៉ែក​ខាងកើតទាំងមូលរបស់សម្ព័ន្ធមិត្ត»។

ការកត់សម្គាល់បែប​នេះ​របស់លោកស្រី បានកើតឡើងបន្ទាប់ពីមាន​ការរំលោភលើដែនអាកាសជាច្រើនលើកថ្មីៗនេះ នៅក្នុងតំបន់បាល់ទិក។

កាល​ពី​ថ្ងៃចន្ទ យន្តហោះចម្បាំងបារាំងដែលចូលរួមក្នុងបេសកកម្មនគរបាល​ដែន​អាកាសបាល់ទិករបស់អង្គការ​ណាតូ បានបាញ់ទម្លាក់​យាន​ដ្រូន​ ១គ្រឿងដែលត្រូវបានប្រទះឃើញ នៅប្រទេសឡាតវី។ លោកស្រី Ruginiene បាននិយាយថា បទពិសោធន៍របស់អ៊ុយក្រែន ក្នុងការដោះស្រាយការគំរាមកំហែងបែបនេះ ផ្តល់នូវមេរៀនដ៏មានតម្លៃ សម្រាប់តំបន់នេះ៕