គុនដាវ៖ លោក ឃុត សៀង ប្រធានបច្ចេកទេសសហព័ន្ធកីឡាគុនដាវកម្ពុជាបានបញ្ជាក់ថា ការប្រកួតកីឡាគុនដាវពានរង្វាន់វេស្ទើនគឺជាការប្រកួតផ្លូវការមួយរបស់សហព័ន្ធ ហើយក៏ជាឱកាសដើម្បីសាកល្បងសមត្ថភាពមន្ដ្រីបច្ចេកទេស និងអាជ្ញាកណ្ដាល ដើម្បីធានាបាននូវសមត្ថភាពត្រៀមរៀបចំការប្រកួតកីឡាស៊ីហ្គេមឆ្នាំ២០២៣ នៅកម្ពុជាផងដែរ។
ការលើកឡើងនេះ បន្ទាប់ពីសហព័ន្ធបានរៀបចំការប្រកួតកីឡាគុនដាវពានរង្វាន់វេស្ទើនលើកទី២ នៅកីឡដ្ឋានវេស្ទើនកាលពីចុងសប្ដាហ៍កន្លងទៅ។ ប៉ុន្ដែលោកបានបង្ហាញនូវផែនការប្រកួតមួយចំនួនទៀត ដើម្បីសម្រួចសមត្ថភាពមន្ដ្រីបច្ចេកទេសបន្ថែម បន្ទាប់ពីសហព័ន្ធបានមើលឃើញចំណុចខ្វះខាតជាច្រើន ដែលត្រូវធ្វើការដោះស្រាយ និងបំពេញបន្ថែមឲ្យបានលឿនបំផុត។ ប្រធានបច្ចេកទេសដដែលបន្ដថា ក្នុងឆ្នាំ២០២២ នេះ សហព័ន្ធត្រៀមរៀបចំការប្រកួត ២ប្រភេទទៀតក្នុងត្រីមាសទី៣ និងត្រីមាសទី៤ ពិសេសរៀបចំការប្រកួតក្នុងព្រឹត្តិការណ៍កីឡាជាតិនាខែវិច្ឆិកា ឆ្នាំ២០២២ ដើម្បីបង្កើនបទពិសោធន៍ និងពង្រឹងសមត្ថភាពរបស់មន្ដ្រីបច្ចេកទេសរបស់ខ្លួន និងការត្រួតពិនិត្យសម្ភារប្រកួតផងដែរ ដើម្បីឆ្លើយតបនឹងផែនការយុទ្ធសាស្ដ្ររបស់សហព័ន្ធ ក្នុងការត្រៀមខ្លួនធ្វើម្ចាស់ផ្ទះស៊ីហ្គេមឆ្នាំ២០២៣។
សម្រាប់ការប្រកួតពានរង្វាន់វេស្ទើនឆ្នាំ២០២២ នេះគឺមានកីឡាករ-កីឡាការិនីចុះឈ្មោះចូលរួម ៦២នាក់មកពី ៨សាលាដោយប្រកួតលើ ២វិញ្ញាសា។ ជាលទ្ធផលសម្រាប់ការប្រកួតវិញ្ញាសាដាវធំឯកត្ដជនបុរសលេខ១ បានទៅកីឡាករ សុខ ចាន់ឬទ្ធី មកពីវិទ្យាល័យជាស៊ីម សាមគ្គី, លេខ២ កីឡាករ ខឿន ទីម៉ា មកពីវិទ្យាល័យឥន្ទ្រទេវី និងមេដាយសំរឹទ្ធស្ទួនបានទៅកីឡាករ លាន ម៉ូសេ មកពីវិទ្យាល័យជាស៊ីម សាមគ្គី និងកីឡាករ ភារក្ស ភារិន មកពីក្លិប Glory។ ដោយឡែកមួយវិញទៀតគឺវិញ្ញាសាដាវធំឯកត្តជននារីដែលចំណាត់ថ្នាក់លេខ១ បានទៅកីឡាការិនី រុំ ស្រីឡែន មកពីវិទ្យាល័យឥន្ទ្រទេវី, លេខ២ កីឡាការិនី ប៉ែន ណារីតា មកពីសាលាអន្ដរជាតិវេស្ទើន និងលេខ៣ ស្ទួនបានទៅកីឡាការិនី ប្រាក់ បញ្ញាទេវី មកពីសាលាអន្ដរជាតិវេស្ទើន និងកីឡាការិនី ហៃ ស្រីស្រស់ មកពីវិទ្យាល័យជម្ពូវ័ន៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
