អតិផរណាអ្នកប្រើប្រាស់នៅសហរដ្ឋអាមេរិក បានកើនឡើងក្នុងល្បឿនលឿនបំផុតនៅក្នុងខែឧសភា ក្នុងរយៈពេលបីឆ្នាំកន្លងទៅនេះ ដែលជំរុញដោយការកើនឡើងតម្លៃផលិតផលថាមពលក្នុងពេលមានជម្លោះនៅតំបន់មជ្ឈិមបូព៌ា ។

ការកើនឡើងយ៉ាងខ្លាំងនៃសន្ទស្សន៍តម្លៃអ្នកប្រើប្រាស់រយៈពេលបីខែជាប់ៗគ្នា ដែលត្រូវបានរាយការណ៍ដោយក្រសួងការងារកាលពីថ្ងៃពុធ បានបញ្ជាក់ពីសម្ពាធកាន់តែខ្លាំងឡើងលើគ្រួសារដែលកំពុងប្រើប្រាស់ប្រាក់សន្សំរបស់ពួកគេកាន់តែច្រើនឡើង។

អតិផរណា បានធ្វើឱ្យប្រាក់ឈ្នួលថយចុះសម្រាប់ខែទីពីរជាប់ៗគ្នានៅក្នុងខែឧសភា ដែលអាចធ្វើឱ្យប៉ះពាល់ដល់កំណើនសេដ្ឋកិច្ចទាំងមូល។ ការចំណាយលើជីវភាពរស់នៅដែលកើនឡើងខ្ពស់ គឺជាការទទួលខុសត្រូវខាងនយោបាយសម្រាប់ប្រធានាធិបតីសហរដ្ឋអាមេរិក លោក Donald Trump និងគណបក្សសាធារណរដ្ឋរបស់លោក ដែលកំពុងស្វះស្វែងរក្សាការគ្រប់គ្រងសភានៅក្នុងការបោះឆ្នោតពាក់កណ្តាលអាណត្តិនៅខែវិច្ឆិកាខាងមុខ។ លោក Trump បានទទួលជ័យជម្នះក្នុងការបោះឆ្នោតប្រធានាធិបតីកាលពីឆ្នាំ២០២៤ មួយផ្នែកធំដោយសារតែការសន្យារបស់លោកក្នុងការកាត់បន្ថយអតិផរណា ប៉ុន្តែបានមើលឃើញប្រជាប្រីយភាពរបស់លោកបានធ្លាក់ចុះ ខណៈការខកចិត្តកើនឡើងលើការគ្រប់គ្រងសេដ្ឋកិច្ចរបស់លោក។ នៅពេលត្រូវបានសួរអំពីសម្ពាធតម្លៃកើនឡើង លោក Trump បានប្រាប់អ្នកសារព័ត៌មានថា «ខ្ញុំស្រឡាញ់អតិផរណា» ដោយនិយាយបន្ថែមថា «វានឹងធ្លាក់ចុះភ្លាមៗ» នៅពេលដែលសង្គ្រាមដឹកនាំដោយសហរដ្ឋអាមេរិកជាមួយអ៊ីរ៉ង់ បញ្ចប់។