លោកប្រធានាធិបតី Volodymyr Zelenskyy បាននិយាយថា កងកម្លាំងអ៊ុយក្រែន បានបើកការវាយប្រហារដោយមីស៊ីលចូលជ្រៅទៅក្នុងទឹកដីរបស់ប្រទេសរុស្ស៊ី ដោយបានវាយប្រហាររោងចក្រយោធាដ៏សំខាន់មួយកាលពីយប់ថ្ងៃពុធ១០មិថុនាសប្ដាហ៍នេះ ។

លោកបាននិយាយថា មីស៊ីលតម្រង់គោលដៅ FP-5 Flamingo បានវាយប្រហាររោងចក្រផលិតយានដ្រូន និងមីស៊ីលក្នុងទីក្រុង Cheboksary នៃសាធារណរដ្ឋ Chuvash ចម្ងាយជាង ៩០០ គីឡូម៉ែត្រ ពីសមរភូមិជួរមុខ។ ក្រុមមន្ត្រីមូលដ្ឋានបាននិយាយថា មនុស្សបីនាក់បានរងរបួសនៅក្នុងការវាយប្រហារដោយមីស៊ីលលើទីក្រុងនេះ។

អ៊ុយក្រែនក៏បាននិយាយផងដែរថា ខ្លួនបានវាយប្រហារកំពង់ផែ Mariupol ដែលកាន់កាប់ដោយទីក្រុងមូស្គូនៅលើសមុទ្រ Azov រោងចក្រចម្រាញ់ប្រេងរបស់រុស្ស៊ីនៅទីក្រុង Samara និងនាវាដឹកប្រេង "shadow fleet" នៅក្នុងសមុទ្រខ្មៅ។

ក្នុងរយៈពេលប៉ុន្មានខែថ្មីៗនេះ យោធាអ៊ុយក្រែនបានបង្កើនការវាយប្រហារដោយយានដ្រូនរបស់ខ្លួនទៅលើទីតាំងសំខាន់ៗនៅទូទាំងប្រទេសរុស្ស៊ី។

ទីក្រុងគីវនិយាយថា ទីតាំងថាមពលគឺជាគោលដៅស្របច្បាប់ ព្រោះវាអនុញ្ញាតឱ្យទីក្រុងមូស្គូបន្តកិច្ចខិតខំប្រឹងប្រែងធ្វើសង្គ្រាមរបស់ខ្លួន។ ទោះជាយ៉ាងណាក៏ដោយ ការវាយប្រហារដោយមីស៊ីលចូលជ្រៅទៅក្នុងប្រទេសរុស្ស៊ី គឺកម្រមានណាស់។

យោធារុស្ស៊ីបាននិយាយថា អង្គភាពការពារដែនអាកាសរបស់ខ្លួនបានស្ទាក់ចាប់ ឬបាញ់ទម្លាក់យានដ្រូនអ៊ុយក្រែនចំនួន ៣២៦ គ្រឿងនៅលើតំបន់មួយចំនួនពេញមួយយប់។

ទន្ទឹមនឹងនេះ កងទ័ពអាកាសអ៊ុយក្រែនបាននិយាយថា ខ្លួនបានបាញ់ទម្លាក់យានដ្រូនចំនួន ១៨១ គ្រឿងក្នុងចំណោម ២០៧ គ្រឿងដែលបាញ់ដោយរុស្ស៊ីក្នុងអំឡុងពេលនោះ។ ខ្លួនក៏បានទទួលស្គាល់ការវាយប្រហារដោយផ្ទាល់ចំនួន ២១ ដងនៅក្នុងទីតាំងចំនួន ១៤ ផងដែរ៕