ភាគហ៊ុនអាស៊ីបានធ្លាក់ចុះនៅថ្ងៃព្រហស្បតិ៍នេះ ដែលរងសម្ពាធដោយការសម្រុកលក់ចេញនៅ Wall Street បន្ទាប់ពីអំណានអតិផរណារបស់សហរដ្ឋអាមេរិកក្តៅជាងការរំពឹងទុក ខណៈការវាយប្រហារគ្នាជាថ្មីរវាងសហរដ្ឋអាមេរិក និង អ៊ីរ៉ង់ បានជំរុញឱ្យតម្លៃប្រេងកើនឡើង។

សន្ទស្សន៍ទូលំទូលាយបំផុតរបស់ MSCI នៃភាគហ៊ុនអាស៊ី-ប៉ាស៊ីហ្វិក នៅខាងក្រៅប្រទេសជប៉ុន (.MIAPJ0000PUS) បើកផ្ទាំងជួញដូរថ្មីដោយធ្លាក់ចុះ ០,៩ % ដឹកនាំដោយការធ្លាក់ចុះ ៣% នៅក្នុងផ្សារភាគហ៊ុន KOSPI របស់កូរ៉េខាងត្បូងក្នុងការជួញដូរថ្មី។តម្លៃផ្សារភាគហ៊ុន e-mini S&P 500 របស់អាមេរិកបានធ្លាក់ចុះ០,៣%។

យោធាសហរដ្ឋអាមេរិកបាននិយាយកាលពីថ្ងៃពុធថា អាមេរិកបានបើកការវាយប្រហារជុំថ្មីប្រឆាំងគោលដៅជាច្រើននៅក្នុងប្រទេសអ៊ីរ៉ង់ ប៉ុន្មានម៉ោងបន្ទាប់ពីប្រធានាធិបតី Donald Trump បានសន្យាថានឹងវាយប្រហារថ្មី ប្រសិនបើមិនមានកិច្ចព្រមព្រៀងសន្តិភាពសម្រេចបានទេនោះ។ អ៊ីរ៉ង់បានប្រកាសបិទច្រកសមុទ្រ Hormuz ជាការឆ្លើយតបផងដែរ។ តម្លៃប្រេងឆៅ Brent បានកើនឡើង ២% ដល់ ៩៤,៩៣ ដុល្លារក្នុងមួយបារ៉ែល ខណៈការជួញដូរបានបន្តនៅអាស៊ី។

ក្រុមអ្នកយុទ្ធសាស្ត្រជឿថា ភាគហ៊ុនអាស៊ីដែលបានកើនឡើងខ្លាំងបំផុតក្នុងរយៈពេលពីរខែកន្លងមកនេះ ទំនងជានឹងបន្តការខាតបង់ថ្មីៗនេះ ខណៈទីផ្សារសួរថាតើការរំពឹងទុកខ្ពស់សម្រាប់កំណើនប្រាក់ចំណូលដែលបានជំរុញឱ្យទទួលបានប្រាក់ចំណេញ អាចរក្សាគង់បានដែរឬទេ។

ជាមួយគ្នានោះប្រាក់ដុល្លារអាមេរិកបានធ្លាក់ចុះនៅថ្ងៃព្រហស្បតិ៍នេះ ខណៈការវាយប្រហារថ្មីរបស់ អាមេរិកនៅមជ្ឈិមបូព៌ាបានធ្វើឱ្យប៉ះពាល់ដល់អារម្មណ៍មនុស្សទូទាំងពិភពលោក ទន្ទឹមការកើនឡើងនៅក្នុងខែឧសភា អតិផរណាអ្នកប្រើប្រាស់របស់សហរដ្ឋអាមេរិកដល់កម្រិតខ្ពស់បំផុតក្នុងរយៈពេលបីឆ្នាំ ធ្វើឱ្យវិនិយោគិនមានអារម្មណ៍មិនស្រួលអំពីទស្សនវិស័យគោលនយោបាយរូបិយវត្ថុរបស់ធនាគារកណ្តាលសហព័ន្ធ។តម្លៃផ្សារហ៊ុន Tokyo, Hong Kong, Shanghai, Singapore, Sydney, Wellington និងទីក្រុងTaipeiរបស់កោះតៃវ៉ាន់ក៏បានធ្លាក់ចុះផងដែរ៕