កសិករមកពីតំបន់ Cochabamba ភាគខាងលិច បានប៉ះទង្គិចជាមួយនគរបាលកាលពីថ្ងៃពុធ ទី១០ ខែមិថុនា បន្ទាប់ពីបានទៅដល់រដ្ឋធានី La Paz ដើម្បីទាមទារឱ្យបញ្ចប់រដ្ឋាភិបាលរបស់ប្រធានាធិបតី លោក Rodrigo Paz ក្រោយភាពវឹកវរស៊ីវិលរយៈពេលច្រើនសប្តាហ៍ នៅក្នុងប្រទេសតំបន់ភ្នំអង់មួយនេះ ។

ការប៉ះទង្គិចគ្នា បានផ្ទុះឡើងនៅពេលដែលក្រុមអ្នកតវ៉ា បានព្យាយាមចូលទៅដល់តំបន់ Plaza Murillo ជាកន្លែងដែលរដ្ឋាភិបាលមានមូលដ្ឋាននៅទីនោះ ហើយនគរបាលបង្ក្រាបកុបកម្ម បានរារាំងការចូលទៅដល់របស់ពួកគេ។ ប្រជាជននៅទីក្រុង La Paz ដែលបានត្អូញត្អែរអំពីកង្វះការផ្គត់ផ្គង់ និងការរំខានដែលបណ្តាលមកពីការបិទផ្លូវ បានស្រែកដាក់ក្រុមអ្នកតវ៉ា និងបានគាំទ្រនគរបាលដោយការទះដៃសាទរ។

ការដង្ហែក្បួនតវ៉ា ជាផ្នែកមួយនៃរលកភាពវឹកវរដែលបានធ្វើឱ្យប្រទេសនេះភាគច្រើនជាប់គាំង ចាប់តាំងពីដើមខែឧសភា តាមរយៈការបិទផ្លូវ និងកូដកម្មដឹកនាំដោយសហជីព កសិករ និងអ្នកគាំទ្រអតីតប្រធានាធិបតី លោក Evo Morales។

លោក Morales បានគាំទ្រចលនាតវ៉ា អំពាវនាវឱ្យមានការបោះឆ្នោតមុនពេលកំណត់ និងបានពិពណ៌នាអំពីភាពវឹកវរនេះថាជាការតតាំងប្រឆាំងនឹងគោលនយោបាយសេដ្ឋកិច្ចរបស់លោក Paz។

សហរដ្ឋអាមេរិក បានបញ្ជាក់ជាថ្មីកាលពីថ្ងៃទី៤ ខែមិថុនា អំពីការគាំទ្ររបស់ខ្លួនចំពោះរដ្ឋាភិបាល លោក Paz ដោយព្រមានប្រឆាំងការប៉ុនប៉ងផ្តួលរំលំរដ្ឋបាលរបស់លោក និងប្តេជ្ញាថានឹងបន្តកិច្ចខិតខំប្រឹងប្រែងដើម្បីរក្សាសន្តិសុខក្នុងតំបន់។