ភ្នំពេញ៖ សម្ដេចអគ្គមហាសេនាបតីតេជោ ហ៊ុន សែន បានបង្ហាញពីការខិតខំរបស់រាជរដ្ឋាភិបាលដែលបានធ្វើឱ្យ៤ឆ្នាំ ចុងក្រោយកម្ពុជា គ្មានការស្លាប់ដោយគ្រុនចាញ់ បើទោះជាប្រឈមនឹងជំងឺកូវីដ-១៩ ក៏ដោយ។

ការលើកឡើងរបស់សម្តេចតេជោបែបនេះ តាមរយៈសារក្នុងឱកាសខួបលើកទី៥០ នៃឱសថអាតេមីស៊ីនីន និងវេទិកាសហប្រតិបត្តិការអន្តរជាតិ ដើម្បីកសាងសហគមន៍​នៃ​សុខភាពទូទៅ​សម្រាប់មនុស្សជាតិ។

សម្តេចតេជោ បានគាំទ្រចំពោះគ្រប់សកម្មភាព ​និងកិច្ចសហប្រតិបត្តិការ ​ដែលបាន​និងកំពុងអនុវត្ត ដើម្បី​កសាងសហគមន៍នៃសុខភាពទូទៅសម្រាប់មនុស្សជាតិ ​ជាពិសេស ការលុបបំបាត់​ជំងឺគ្រុនចាញ់ ​តាមរយៈការប្រើប្រាស់ឱសថអាតេមីស៊ីនីន ។

សម្តេចបន្តថា សម្រាប់ប្រទេសកម្ពុជាដែលស្ថិតក្នុងមហាអនុតំបន់ទន្លេមេគង្គ ធ្លាប់មានជំងឺគ្រុន​ចាញ់ជាង ១៧ម៉ឺន ករណី និងស្លាប់ជិត ១.០០០នាក់ នាទស្សវត្សឆ្នាំ៨០ ។ ក្នុងឆ្នាំ ២០២១ កន្លងទៅជំងឺគ្រុនចាញ់បានថយចុះមកនៅចំនួន ៣.៩៥៩ ករណី ​និងគ្មានអ្នកស្លាប់រយៈពេល ៤ ឆ្នាំចុងក្រោយ បើទោះជាប្រឈមនឹងការលំបាកដោយសារការរីករាលដាលនៃជំងឺកូវីដ-១៩ ក៏ដោយ។

សម្តេចតេជោ បានបន្តថា សម្រាប់ទិសដៅទៅអនាគត, កម្ពុជានឹងបន្តពង្រឹងកិច្ច​សហការ​ជាមួយ​គ្រប់តួអង្គពាក់ព័ន្ធទាំងអស់ ជាពិសេសសាធារណរដ្ឋប្រជាមានិតចិន ​តាមរយៈគំនិតផ្តួតផ្តើម​ខ្សែ​ក្រវ៉ាត់និងផ្លូវ កិច្ចសហប្រតិបត្តិការមេគង្គ-ឡានឆាង ​និងមូលនិធិជំនួយ ​សហប្រតិបត្តិការត្បូង-ត្បូងប្រទេសចិនជាដើម ដើម្បីឈានទៅលុបបំបាត់ជំងឺគ្រុនចាញ់ទាំងស្រុង ។

សម្តេចតេជោនាយករដ្ឋមន្រ្តី បានអំពាវនាវដល់ភាគីពាក់ព័ន្ធទាំងអស់ បន្តជំរុញកិច្ច​សហប្រតិបត្តិការ​ផ្អែកលើ ទំនុកចិត្ត, ភាពជាដៃគូដោយយកប្រជាជនជាស្នូល និងមូលដ្ឋានពហុភាគីនិយម ដើម្បីឈានឆ្ពោះទៅសម្រេចទស្សនៈវិស័យ ​ពិភពលោកគ្មានជំងឺគ្រុនចាញ់ឆ្នាំ ២០២៥ ៕អត្ថបទ មុត សុត