កណ្តាល៖ រថយន្តស្ទូច (ចរាចរណ៍) ១គ្រឿង និង ម៉ូតូចំនួន​៥៥គ្រឿង បានប្រគល់ជូន​ដល់ស្នងការដ្ឋាន​នគរបាលខេត្តកណ្តាល ដើម្បីបម្រើការងារការពារសន្តិសុខ សណ្តាប់ធ្នាប់​ជូនប្រជាពលរដ្ឋ​ក្នុងមូលដ្ឋានខេត្តកណ្តាល តបតាមស្នើរសុំនាពេលកន្លងមក ក្នុងទិសដៅ​បម្រើ​ប្រជាពលរដ្ឋ​ឲ្យបានទាន់ពេលវេលា ។

ក្នុងឱកាសប្រគល់-ទទួលនៅថ្ងៃទី២៥ ខែមេសា ឆ្នាំ២០២២ នៅឯស្នងការដ្ឋាន លោក ភឺន ផល្លា បានថ្លែងថា ដោយយល់ឃើញថា ការប្រគល់ម៉ូតូ និងឡាននេះ គឺដើម្បីចូលរួមចំណែកជួយដល់សង្គម និងសម្រួលដល់ការធ្វើដំណើររបស់កងកម្លាំង ដើម្បីការពារសុខសុវត្ថិភាពរបស់ពលរដ្ឋ និងជាកម្លាំងចិត្ត​ដល់​មន្ត្រី​នគរបាល​ក្នុង​ការ​ចុះបំពេញការងារ​របស់ខ្លួនយ៉ាងមានប្រសិទ្ធភាព ។ លោកថ្លែងបន្តថា ទាំងនេះ​ជាទឹកចិត្ត​បប្តិចបន្តួច ​​ដើម្បីរួម​ចំណែក​ជាមួយ​រាជរដ្ឋាភិបាល​ក្នុង​ការ​ជួយ​ជ្រោមជ្រែងជួយ​ឧបត្ថម្ភទៅ​តាមសទ្ធា ហើយនឹងតែ​បន្តជួយ​ជា​បន្ត​បន្ទាប់​ទៅ​តាម​លទ្ធភាព​របស់ខ្លួន។​

ជាមួយគ្នានេះដែរលោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល បានថ្លែងអំណរគុណចំពោះលោក ភឺន ផល្លា និងភរិយា ដែលបានឧបត្ថម្ភជូន​កង​កម្លាំង​ឲ្យ​មាន​មធ្យោបាយ​ល្អ​ជិះ​ល្បាត និងការពារសុខសុវត្ថិភាពជូនពលរដ្ឋ។

លោកស្នងការបានបញ្ជាក់ថា ម៉ូតូទាំងអស់នេះត្រូវបែងចែកដល់គ្រប់ ស្រុក ក្រុង ទាំងអស់​ដោយ​មូលដ្ឋាន​នីមួយៗ ទទួលបានម៉ូតូចំនួន ៥គ្រឿង រីឯរថយន្ត​ស្ទូច​ គឺ​ទុក​សំរាប់​ប្រើប្រាស់​តាម​តម្រូវ​ការ​ចាំបាច់ និងផ្ដាំផ្ញើរដល់កងកម្លាំងទាំងអស់ដែលបានម៉ូតូយកទៅប្រើហើយនោះ សូមថែរក្សា ថែទាំ​ឲ្យ​បានល្អ ហើយសូមបំពេញការងារឲ្យកាន់តែខ្លាំងឡើង ដើម្បីរក្សា​សុខសុវត្ថិភាព​ជូន​ដល់​បង​ប្អូន​ប្រជាពលរដ្ឋនៅមូលដ្ឋានរៀងខ្លួន ការពារកុំឲ្យកើតបទល្មើសជាដើម ៕