ភ្នំពេញ៖ ឯកឧត្តម ថោង ខុន រដ្ឋមន្ត្រីទេសចរណ៍ បានបើកកិច្ចប្រជុំបូកសរុបលទ្ធផលការងារអនុវត្តផែនទីចង្អុលផ្លូវ ស្តីពីផែនការស្តារ និងលើកស្ទួយវិស័យទេសចរណ៍ក្នុងនិងក្រោយវិបត្តិកូវីដ១៩។

នៅក្នុងកិច្ចប្រជុំ រដ្ឋមន្ត្រីទេសចរណ៍ថា វិស័យទេសចរណ៍ ក្រោយថ្ងៃបុណ្យចូលឆ្នាំថ្មីប្រពៃណីខ្មែរនេះ បន្តស្ថិតក្នុងស្ថានភាពល្អ ខណៈនៅចុងសប្តាហ៍ទី៣ ពីថ្ងៃទី២៣ ដល់ថ្ងៃទី២៤ ខែមេសានេះ មានទេសចរចេញដើរកម្សាន្តប្រមាណជាង៣៣ម៉ឺននាក់។

ឯកឧត្តម រដ្ឋមន្ត្រី ថោង ខុន មានប្រសាសន៍ថា នៅក្នុងចំណោមទេសចរទាំង៣៣ម៉ឺននាក់ចេញ​ដើរ​កម្សាន្ត គឺមានភ្ញៀវជាតិមានជាង៣១ម៉ឺននាក់ ​និងភ្ញៀវបរទេសផ្ទៃក្នុងមានចំនួនជិត ​១៦០០០នាក់ ហើយ​គោលដៅ​ទេសចរណ៍សំខាន់ៗ ​មានភ្ញៀវទៅកម្សាន្តច្រើនជាងគេរួមមាន៖ទី១ ខេត្តព្រះសីហនុ​មានភ្ញៀវទៅកម្សាន្ត ៥៥០០០ ទី២ខេត្តបាត់ដំបង មានជាង៤ម៉ឺននាក់ ទី៣ ខេត្តពោធិ៍សាត់ និងរាជធានីភ្នំពេញ បន្ទាប់មក ខេត្តកំពត ខេត្តកែប និងខេត្តសៀមរាប។

ឯកឧត្តម ថោង ខុន បានវាយតំលៃថា ចំនួនភ្ញៀវប្រមាណជិត ៣៣ម៉ឺននាក់នាចុងសប្តាហ៍នេះ ជា​ចំនួន​មួយច្រើនធៀប​នឹង​ចុង​សប្តាហ៍ធម្មតាដែលពុំមានពិធីបុណ្យជាតិ ដែលមានចំនួនជាមធ្យមក្នុង​ចន្លោះ២០-២៥ម៉ឺននាក់។

បើតាមលោក ធួន ស៊ីណាន ប្រធានសមាគមន៍ទេសចរណ៍អាស៊ីប៉ាស៊ីភិច ប្រចាំនៅកម្ពុជា បាន​ថ្លែងថា ជា​ទូទៅគ្រប់​បណ្តាអាជីវកម្មទេសចរណ៍នានា តែងតែមានតម្រូវការខ្លាំងនិងមានកំណើន​ភ្ញៀវទេសចរជាតិអន្តរជាតិចេញដើរកម្សាន្ត​ នៅរៀងរាល់ចុងសប្តាហ៍នានា។

លោក បន្តថា វត្តមានភ្ញៀវទេសចរជាតិអន្តរជាតិ ចេញដើរកម្សាន្តច្រើននៅតាមថ្ងៃឈប់សំរាក​ប្រចាំ​ចុង​សប្តាហ៍នោះ​ គឺសញ្ញាវិជ្ជមានមួយដ៏ល្អប្រសើរបំផុតនៃការរីកចំរើនវិស័យទេសចរណ៍កម្ពុជា ជា​ពិសេស​បំផុតនោះ​ គឺការជម្រុញអោយបណ្តាអាជីវកម្មនានានៅក្នុងនៅក្នុងវិស័យទេសចរណ៍ មាន​ដំណើរការបើកឡើងវិញ ​ក៏ដូចជម្រុញចរន្តសេដ្ឋកិច្ចកម្ពុជា​ មានការរីកចំរើនផងដែរ។

បើតាមក្រសួងទេសចរណ៍​ នៅក្នុងអំឡុងពេលចេញដើរកម្សាន្តនៅរៀងរាល់ថ្ងៃចុងសប្តាហ៍ គឺជា​មធ្យមភ្ញៀវទេសចរជាតិអន្តរជាតិម្នាក់ៗចំណាយថវិកាអស់ប្រមាណ៥០ដុល្លា​ ដើម្បីធ្វើដំណើរ ស្នាក់នៅ​ និងការម្ហូបអាហារនានា ​និងចំណាយនានាទៀត។

ឯកឧត្តម ណេប សាមុត បញ្ជាក់ថា នៅក្នុងចំណោមអាជីវកម្មទេសចរណ៍​ប្រមាណជាង ៣ ០០០ ទីតាំងដែលបានបិទបណ្តោះអាសន្នកន្លងមក ​គិតត្រឹមថ្ងៃទី៣១ខែមីនា ឆ្នាំ២០២២ មាន​អាជីវកម្ម​ទេសចរណ៍​ប្រមាណជាង ១ ៧៤៩ អាជីវកម្ម ​បានកំពុងបើកដំណើរការ ហើយនៅសល់​អាជីវកម្ម​ទេសចរណ៍ ១ ៤២៩ ​ទីតាំងបន្តរងប៉ះពាល​ និងប៉ះពាលការងារផ្ទាល់ប្រមាណជាង​ ជិត ២៤ ០០០ នាក់ ស្មើនឹង២៦.៤១ភាគរយ ៕អត្ថបទ ស៊ុម សុខជា