ព្រះសីហនុ៖ បណ្តាអាជីវកម្មក្នុងវិស័យទេសចរណ៍នៅខេត្តព្រះសីហនុ រួមមានសណ្ឋាគារលំដាប់ផ្កាយ តំបន់រមណីយដ្ឋានៗនានា នៅតាមឆ្នេរ និងកោះនានា បានបង្កើនកិច្ចសហការជាមួយក្រុមហ៊ុនការីទេសចរណ៍ ត្រៀមទទួលភ្ញៀវអន្តរជាតិ ដែលមកទស្សនាកម្ពុជា តាមកញ្ចប់ទេសចរណ៍ ដែលនឹងកើនឡើងមានឡើងច្រើននៅខែបន្ទាប់ខាងមុខនេះ។

តំណាងម្ចាស់សណ្ឋាគារ និងម្ចាស់រមណីយដ្ឋានទេសចរណ៍ប្រណិតនៅខេត្តព្រះសីហនុ បានថ្លែង​ប្រាប់BTVនៅថ្ងៃទី២៥ ខែមេសានេះថា អាជីវកម្មទេសចរណ៍មួយចំនួនដែលបាន​បិទបណ្តោះ​អាសន្ន អស់រយៈពេលប្រមាណជា២ឆ្នាំកន្លងមក ដោយសារគ្មានភ្ញៀវចូលទទួលសេវា ក្នុង​វិបត្តិការ​រាតត្បាត​កូវីដ១៩នោះ រហូតមកដល់ពេលនេះ​គឺមានអាជីវកម្មមួយចំនួនធំបានរៀបចំ​បើកមកវិញជា​បណ្តើរៗ ហើយ បាននិងកំពុង ជម្រុញ​បើកកិច្ចសហការជាមួយជាមួយបណ្តាក្រុមហ៊ុនការី​ទេសចរណ៍​និង​ក្រុមហ៊ុនដៃគូនានាទៀត ត្រៀម​ទទួលភ្ញៀវទេសចរអន្តរជាតិ​ទៅ​តាមបរិបថ្មីក្រោយ​ស្ថានការណ៍​កូវីដ១៩ មានការធូរស្រាល។

បើតាមលោកស្រី ឆាយ សៀវលីន ប្រធានសមាគមន៍ទីភ្នាក់ងារទេសចរណ៍កម្ពុជា CATA បានថ្លែងថា ​នៅក្នុងអំឡុងចាប់ពីខែកញ្ញា ក្នុងឆ្នាំ២០២២ នៅគោលដៅទេសចរណ៍​ខេត្តព្រះសីហនុ ក៏ដូចជា​នៅបណ្តាគោលដៅទេសចរណ៍​នៅតាមបណ្តាខេត្តនានាទៀត នឹងមានភ្ញៀវទេសចរ​អន្តរជាតិ​ច្រើន​ឡើងវិញ​មកទស្សនាកម្ពុជា ខណៈនៅក្នុងរដូវចាប់ពីខែតុលារហូតដល់​ដំណាច់​ឆ្នាំនោះ ​គឺជារយៈពេលមួយដែលភ្ញៀវទេសចរអន្តរជាតិ​នៅតាម​បណ្តាប្រទេសនឹងឈប់សំរាក​វិស្សមកាល​ការងារច្រើន ហើយខេត្តព្រះសីហនុ ក៏​ជា​គោលដៅ​ទេសចរណ៍​ដ៏សំខាន់ដែលនឹងមាន​ភ្ញៀវអន្តរជាតិ​ទៅទស្សនាច្រើន។

លោក តាំង សុចិត្រគ្រឹស្នា ប្រធានមន្ទីរទេសចរណ៍ខេត្តព្រះសីហនុ ថ្លែងថា នៅខេត្តព្រះសីហនុ​នៅ​ពេលបច្ចុប្បន្ននេះ មានអាជីវកម្មទេសចរណ៍ប្រមាណជាង៤០% បានបើកដំណើរការអាជីវកម្មរបស់​ខ្លួន​ឡើងវិញ ហើយអាជីវកម្មដែលបានប្រកាសបើកដំណើរការទាំង​នោះ​ ភាគច្រើន ជា​អាជីវកម្មសណ្ឋាគារ​ ផ្ទះស្នាក់ ​ភោជនីយដ្ឋាន​ មណ្ឌលកម្សាន្ត និងរមណីយដ្ឋានទេសចរណ៍ និងអេកូទេសចរណ៍នានាទៀត។

លោក បន្តថា នៅក្នុងអំឡុងពេលនេះ ខេត្តកំពុងបានសហការជាមួយបណ្តាសមាគមCATA និង​បណ្តា​ក្រុមហ៊ុន​ការីទេសចរណ៍នានាទៀត ​ដើម្បីជម្រុញការផលិផលិតផលទេសចរណ៍ និង​សេវា​កម្មទេសចរណ៍ថ្មីៗបន្ថែម​ ទៅក្នុងកញ្ចប់ទស្សនកិច្ចសម្រាប់លក់ជូនភ្ញៀវទេសចរក្នុងស្រុក និង​ភ្ញៀវ​បរទេសអោយបានច្រើន និងមានភាពសម្បូរបែប សំដៅបង្កើនភាពទាក់ទាញភ្ញៀវទេសចរ​មក​ពីក្រៅប្រទេស៕ អត្ថបទ ស៊ុម សុខជា