​បាល់ទាត់៖ ​ក្រុម​ជើងឯក​ថៃ BG Pathum United បាន​បន្ត​ការ​នាំមុខគេ​ក្នុង​ពូ​ល G នៃ​ក្របខណ្ឌ AFC Champions League ក្រោយ​យកឈ្នះ​ក្រុម​ហ្វីលីពីន United City FC ៣-១​។

​​កីឡាករ​សិង្ហ​បុរី Ikhsan Fandi រកបាន​ពីរ​គ្រាប់​ម្នាក់ឯង​បន្ទាប់ពី Diogo បើក​ការ​នាំមុខ មុនពេល​ដែល Mark Hartmann តប​បាន​មួយ​គ្រាប់​ឱ្យ United City តែ​យឺត​ពេល​ទៅហើយ BG Pathum United យកឈ្នះ ៣-១ ដើម្បី​នាំមុខគេ​ក្នុង​ពូ​ល G នេះ​មាន ១០ពិន្ទុ​ក្រោយ​ឈ្នះ ៣ ស្មើ ១ មិនដែល​ចាញ់ ខណៈដែល United City នៅតែ​មិនមាន​ពិន្ទុ​រាប់​ក្រោយ​ចាញ់​ទាំង ៤ប្រកួត​។ ​​ក្នុង​ពូ​ល​នេះដែរ Jeonnam Dragons និង Melbourne City FC បាន​ត្រឹម​បញ្ចប់​ដោយ​ស្មើគ្នា ១-១ មានន័យថា Melbourne City ធ្លាក់​មក​លេខ២ មាន ៨ពិន្ទុ ​ខណៈ Jeonnam Dragons ឈរ​លេខ៣ មាន ៤ពិន្ទុ​។

ងាក​មក​ពូ​ល I ជើងឯក​ជប៉ុន Kawasaki Frontale បាន​យកឈ្នះ​ក្រុម​ម៉ាឡេស៊ី Johor Darul Ta’Zim ៥-០​។

​Yu Kobayshi បន្ត​រកបាន​គ្រាប់​ទៀត​ក្នុង​ការប្រកួត​នេះ​ពីរ​គ្រាប់​ម្នាក់ឯង ខណៈ​កីឡាករ​ថៃ Chanathip Songkrasin ក៏​រកបាន​មួយ​គ្រាប់​ដែរ​។ ​​Kawasaki Frontale បាន​ឡើងមក​នាំមុខគេ​វិញ​ក្នុង​ពូ​ល I នេះ​មាន ៨ពិន្ទុ ទំលាក់ JDT ទៅ​លេខ២ វិញ​មាន ៧ពិន្ទុ​។ ​​ចំណែកឯ Ulsan Hyundai ឈរ​លេខ៣ មាន ៧ពិន្ទុ​ផងដែរ​ក្រោយ​យកឈ្នះ Guangzhou FC ដោយ​លទ្ធផល ៥-០ ដែរ​។ ​​មួយ​ពូ​ល​ទៀត​នៅ​តំបន់​ខាងកើត​នេះ​គឺ​ពូ​ល F បី​ក្រុម​កំពុងកាន់ ៧ពិន្ទុ​ដូចគ្នា​គឺ​ក្រុម​ជប៉ុន Urawa Red Diamonds ឈរលើ​គេ​ក្រោយ​ស្នើ​ជាមួយ Daegu FC ០-០ ខណៈដែល Lion City Sailors របស់​សិង្ហ​បុរី​ឈរ​លេខ៣ ក្រោយ​យកឈ្នះ Shandong Luneng ៣-២៕

​អត្ថបទ​៖​នាង សុភា​វុ​ធ