​អ៊ុយក្រែន៖ ការ​ប្រយុទ្ធ​គ្នា​ខ្លាំង​នៅតែ​បន្ត​ក្នុង​ប្រទេស​អ៊ុយ​ក្រែ​ន ខណៈ​កាលពី​ថ្ងៃអាទិត្យ​គឺជា​ថ្ងៃ​ប្រារព្ធ​ខួប ២​ខែ​ចាប់​តាំង​ពី​ការ​វាយ​លុក​របស់​រុស្ស៊ី​មក​លើ​អ៊ុយ​ក្រែ​ន​បាន​ចាប់ផ្ដើម​។ ទាហាន​រុស្ស៊ី​កំពុង​បង្កើន​ការ​វាយ​ប្រហារ​របស់​ខ្លួន​លើ​ភាគ​ខាងកើត​របស់​អ៊ុយ​ក្រែ​ន និង​តំបន់​ផ្សេងទៀត​។​

​អភិបាលក្រុង Serhiy Haidai នៃ​តំបន់ Luhansk ភាគ​ខាងកើត​ប្រទេស​អ៊ុយ​ក្រែ​ន បាន​សរសេរ​នៅ​លើ​គេហទំព័រ​របស់​រដ្ឋបាល​តំបន់​កាលពី​ថ្ងៃអាទិត្យ​ថា កងកម្លាំង​រុស្ស៊ី​បាន​បាញ់​មី​ស៊ី​ល​ទៅលើ​តំបន់​លំនៅឋាន​ពលរដ្ឋ ​នៅ​ភាគ​ខាងលិចបណ្ដាល​ឲ្យ​មនុស្ស ​៨​នាក់​ស្លាប់ និង​របួស​ ២​នាក់​ទៀត​។​ ​ទីប្រឹក្សា​ប្រធានាធិបតី​អ៊ុយ​ក្រែ​ន​លោក Mykhailo Podolyak បាន​សរសេរ​នៅ​លើ​បណ្តាញ Twitter ថា រុស្ស៊ី​កំពុង​បន្ត​វាយប្រហារ​រោងចក្រ​ស្លដែក​ក្នុង​ទីក្រុង​កំពង់ផែ Mariupol ភាគ​ខាងកើត ហើយ​កន្លែង​ដែល​ជន​ស៊ីវិល និង​យោធា​ស្ថិតនៅ​ត្រូវ​បាន​បាញ់​ផ្លោង​ដោយ​គ្រាប់​ផ្លោង​តាម​អាកាស និង​កាំភ្លើង​ធំ​។ ក្នុង​ពេល​មានការ​វិវត្តន៍​ទាំងនេះ កិច្ច​ខិតខំ​ប្រឹងប្រែង​ផ្នែក​ការទូត​កំពុង​ដំណើរការ ដើម្បី​សម្រប​សម្រួល​បទ​ឈប់​បាញ់​រវាង​រុស្ស៊ី និង​អ៊ុយ​ក្រែ​ន​។

​ការិយាល័យ​ប្រធានាធិបតី​ទួរគី​បាន​និយាយ​កាលពី​ថ្ងៃអាទិត្យ​ថា ​ប្រធានាធិបតី​លោក Recep Tayyip Erdogan បាន​ថ្លែង​ទៅកាន់​សម​ភាគី​អ៊ុយ​ក្រែ​ន​របស់​លោក​គឺ​លោក ​Volodymyr Zelenskyy ក្នុង​អំឡុង​ពេល​សន្ទនា​តាម​ទូរស័ព្ទ​ថា ​ប្រទេស​របស់​លោក​ត្រៀមខ្លួន​ជាស្រេច​ក្នុង​ការ​ផ្តល់​ជំនួយ ដែល​អាច​ធ្វើ​ទៅ​បាន​សម្រាប់​ដំណើរ​ការចរចា​។ ​ជាមួយ​គ្នា​នេះ អគ្គលេខាធិការ​អង្គការសហប្រជាជាតិ​លោក Antonio Guterres ត្រូវ​បាន​គេ​រំពឹង​ថា​នឹង​ជួប​ជាមួយ​ប្រធានាធិបតី​រុស្ស៊ី​លោក Putin នៅ​ទីក្រុង​មូ​ស្គូ​នៅ​ថ្ងៃ​អង្គារ និង​ជួបជាមួយ​ប្រធានាធិបតី​អ៊ុយ​ក្រែ​ន​លោក Volodymyr Zelenskyy ក្នុង​ទីក្រុង​គី​វ​នៅ​ពីរ​ថ្ងៃ​បន្ទាប់៕

អត្ថបទ៖ ប៊ុនថន