ក្រសួងពាណិជ្ជកម្មចិនបានបញ្ជាក់​ថា ខ្លួនប្រឆាំងយ៉ាងដាច់អហង្ការ ចំពោះការសម្រេចចិត្តរបស់សហរដ្ឋអាមេរិក ក្នុងការដាក់ស្លាកក្រុមហ៊ុនបន្ថែមទៀតថា ជា «ក្រុមហ៊ុនយោធា» ដោយចោទប្រកាន់ទីក្រុងវ៉ាស៊ីនតោនថា បានប្រើប្រាស់សន្តិសុខជាតិជាលេស ដើម្បីទប់ស្កាត់ការអភិវឌ្ឍរបស់ក្រុមហ៊ុនចិន។

យោងតាមសេចក្តីថ្លែងការណ៍មួយ នាថ្ងៃសៅរ៍ (ទី១៣ ខែមិថុនា ឆ្នាំ២០២៦) បាន​ឲ្យ​ដឹង​ថា ក្រសួងមិនពេញចិត្តយ៉ាងខ្លាំង ចំពោះចំណាត់ការ​នេះ ដែលមិនអើពើនឹងទំនាក់ទំនងពាណិជ្ជកម្មចិន-អាមេរិកកាន់តែទូលំទូលាយ ធ្វើឲ្យ​ខូចសណ្តាប់ធ្នាប់សេដ្ឋកិច្ចពិភពលោក គំរាមកំហែងដល់ស្ថិរភាពខ្សែច្រវាក់​ក់ផ្គត់ផ្គង់ ខណៈពេលដែលប៉ះពាល់ដល់សិទ្ធិស្របច្បាប់របស់សហគ្រាសចិន។

សេចក្ដី​ថ្លែង​ការណ៍​បាន​បន្ថែម​ថា ទីក្រុងប៉េកាំងបានជំរុញឲ្យ​សហរដ្ឋអាមេរិកកែប្រែការកំណត់នេះ​ជាបន្ទាន់ និងផ្តល់នូវ​ការប្រព្រឹត្តដោយយុត្តិធម៌ និងមិនរើសអើងដល់ក្រុមហ៊ុនចិន ដោយព្រមានថា ខ្លួននឹងចាត់វិធានការតបត «យ៉ាងម៉ឺងម៉ាត់ និងខ្លាំងក្លា» ប្រសិនបើទីក្រុងវ៉ាស៊ីនតោនមិនផ្លាស់ប្តូរទិសដៅនេះ​ទេ​។

គួរ​បញ្ជាក់ថា ការអត្ថាធិប្បាយទាំងនេះបានកើតឡើងបន្ទាប់ពីមន្ទីរបញ្ចកោណ នៅសប្តាហ៍នេះ បានបន្ថែមក្រុមហ៊ុនធំៗមួយចំនួនរបស់ប្រទេសចិន ក្នុង​នោះ​រួមទាំង Alibaba Group Holding, Baidu និង BYD ទៅក្នុងបញ្ជីក្រុមហ៊ុនដែលខ្លួនចាត់ទុក​ថា គាំទ្រដល់​កងទ័ពរំដោះប្រជាជនចិន​។ ចំណាត់ការនេះបានកែសម្រួលកំណែនៃបញ្ជីដែលបានបោះពុម្ពផ្សាយរយៈពេល​ខ្លី​ នៅក្នុងខែកុម្ភៈ មុនពេលត្រូវបានដកចេញវិញ​ដោយគ្មានការពន្យល់៕